ASTANA. 17 maýsym. Qyzylorda oblysy Qazaly aýdanynyń týmasy, Uly Otan soǵysynyń ardageri Sharıf Abdýllın 95 jasqa toldy. Maıdangerdiń úıine mereıtoıymen quttyqtaý úshin Qazaly aýdanynyń ákimi Bahyt Jahanov arnaıy bardy. Bul týraly egemen.kz habarlady.
Sharıf Abdýllın búginde Baıqońyr qalasyndaǵy balasynyń qolynda turady. Atalǵan qalaǵa Jeńistiń 70 jyldyǵymen jáne mereıtoıymen quttyqtap barǵan Bahyt Jahanov ardagerge oblys ákimi Qyrymbek Kósherbaevtyń quttyqtaý hatyn tabys etti. Onda: «El múddesi jolyndaǵy eseli eńbegińizdiń zeınetin kórip, árdaıym aramyzda aqylshy aǵa, ardaqty azamat, abyroıly aqsaqal bolyp aman-esen júre berińiz», – delingen.
Sonymen qatar, aýdan basshysy jyl boıy óńirde atqarylǵan jumystardy aıtyp, aldaǵy ýaqytta atqarylar josparlarymen bólisti.
Jeńis kúnin jaqyndatýǵa úles qosqan mereıtoı ıesi ǵasyrǵa jýyq ǵumyrynda talaı asýdan muqalmaı ótip, eńbek maıdanynda qyzmet etken. Ardager aýdanda atqarylyp jatqan jumystardy qoldaıtynyn aıtyp, aq batasyn berdi.
Talǵat Raıymbek.
Derek, sýret: egemen.kz.