Energetıka mınıstri Almasadam Sátqalıev Úkimet otyrysynda Qazaqstannyń 2024 jylǵy 11 aıdaǵy áleýmettik-ekonomıkalyq ósiminiń qorytyndylary týraly baıandady. Máselen, bıylǵy qańtar-qarasha aılarynyń qorytyndysy boıynsha shamamen 12,3 mln tonna munaı ónimderi óndirildi, dep habarlaıdy Egemen.kz Úkimettiń baspasóz qyzmetine silteme jasap.
Bıylǵy kezeńniń qorytyndysy boıynsha otandyq munaı óńdeý salasy ónimniń negizgi túrleri boıynsha oń serpindi kórsetip jatyr. Otyndy áketýge engizilgen shekteýler ishki naryqty turaqty qamtamasyz etýge yqpal etedi.
Avtobenzın óndirisi 4,9 mln tonnany qurady, bul byltyrǵy deńgeıden 2,1%-ǵa joǵary. Dızel otynyn óndirý kólemi de ulǵaıyp, 4,9 mln tonnaǵa jetken, bul ótken jyldyń sáıkes kezeńimen salystyrǵanda 4,3%-ǵa artyq.
Al, avıaotyn óndirý kórsetkishi 21,4%-ǵa aıtarlyqtaı ósip, 0,68 mln tonnany qurady. Sonymen qatar, mazýt óndirý kólemi 1,8 mln tonnaǵa deıin tómendegen(ótken jyldyń deńgeıine 85,7% – 2,1 mln tonna). Qysqartýdyń sebebi munaı óńdeý tereńdiginiń 85%-dan 87%-ǵa deıin ulǵaıýy bolǵan, bul qaıta óńdeletin ónimniń sapasyn jaqsartýǵa jáne óndiris tıimdiligin arttyrýǵa múmkindik berdi.
«Munaı-gaz-hımııa ónimderin óndirý kólemi 506,1 myń tonnaǵa jetti, bul ótken jyldyń sáıkes kezeńimen salystyrǵanda 1,6 ese artyq», dedi Energetıka mınıstri Almasadam Sátqalıev.Qabyldanǵan sharalar munaı ónimderiniń ishki naryǵyn turaqtandyrýǵa jáne el ekonomıkasynyń strategııalyq mańyzdy salalaryn úzdiksiz qamtamasyz etýge múmkindik berdi.