Astanada áýesqoı sportshylar arasynda belgili aqyn, Memlekettik syılyqtyń laýreaty Nesipbek Aıtulyn eske alýǵa arnalǵan bılıardtan respýblıkalyq týrnır ótti. Jarysqa belgili qalamgerler, zııaly qaýym ókilderi, jalpy sany qyryqqa jýyq adam qatysty.
Astana qalasy ákiminiń orynbasary Eset Baıken týrnırdiń ashylýymen quttyqtap, qatysýshylarǵa sáttilik tiledi. Úzeńgiles dostary, qalamgerler qaýymy aqıyq aqyn týraly estelikter aıtty. Atalǵan is-sharaǵa bastamashy bolǵan senator, Qanysh Sátbaev atyndaǵy halyqaralyq qordyń Qamqorshylyq keńesiniń tóraǵasy Altynbek Nýhuly atap ótkendeı, aqynnyń artynda qalǵan mol murasyn kópshilikke nasıhattaý asa mańyzdy.
– Qazaqtyń ǵulamasy, akademık Qanysh Sátbaevtyń 125 jyldyǵy aıasynda osy tulǵanyń alyp bolmysyn tamasha somdaǵan «Qanysh» poemasynyń avtory, aqyn Nesipbek Aıtulyn eske alý keshin uıymdastyrýdy jón kórdik, – dedi Altynbek Nýhuly.
Áriptesimiz, «Egemen Qazaqstan» gazetiniń fototilshisi Erlan Omarov týrnır jeńimpazy atanyp, birinshi orynǵa, Nesipbek Aıtuly atyndaǵy júldege ıe boldy. Ekinshi oryndy, Muqaǵalı Maqataev atyndaǵy júldeni Senat depýtaty Amangeldi Tolamısovke buıyrdy, úshinshi júldeli oryn, Muzafar Álimbaev atyndaǵy júlde L.N.Gýmılev atyndaǵy Eýrazııa ulttyq ýnıversıtetiniń fotografy Erbol Seıithanulyna buıyrdy.
Qanysh Sátbaev atyndaǵy júldeni eńbek ardageri Ońdasyn Meıirbaev, Medeý Sárseke atyndaǵy júldeni Qazaqstannyń eńbek sińirgen qaıratkeri Aıaǵan Sandybaı, Kákimbek Salyqov atyndaǵy júldeni ardager jýrnalıst Álimjan Sabyrjanuly, Nurtas Ońdasynov atyndaǵy júldeni Qazaqstannyń eńbek sińirgen qaıratkeri, belgili akter Nartaı Saýdanbekuly ıelendi. Buǵan qosa bes júlde – «Alǵashqy shar», «Mergen oıynshy», «Sheber oıynshy», «Mádenıetti oıynshy», «Úzdik dýplet» atalymdarynyń ıegerleri de anyqtaldy. Jarys jeńimpazdary men júldegerlerine arnaıy syı-sııapat tabystaldy. Týrnırdiń bas tóreshisi ulttyq dárejedegi tóreshi, belgili sport jýrnalısi Nesip Júnisbaıuly boldy.