Qalam ustaǵan qaýym asyǵa kútetin «Altyn qalam» ádebı baıqaýynyń bastaý alǵanyna bıyl 15 jyl tolyp otyr. Ádebı ortada tanymal joba aradaǵy úsh jyl úzilisten keıin jańa maýsymyn jarııalap, qalam qýatymen júzden júırik shyqqan avtorlardy marapattaý rásimi Yqylas Dúkenuly atyndaǵy halyq mýzykalyq aspaptar mýzeıinde ótti.
«Altyn qalam» baıqaýynan qanattanǵan qanshama aqyn-jazýshylar oqyrmanǵa tanylyp, topjarǵan týyndylar ult ádebıetiniń ozyq shyǵarmalarynyń qataryna qosylyp keledi. Elimizdiń jas daryndary men jańa esimderin qalyń jurtqa tanystyrýǵa septigin tıgizip kele jatqan baıqaý bıyl Nurlan Smaǵulov qorynyń qoldaýymen ótti.
Mereıli dataǵa tuspa-tus kelgen baıqaýǵa 115 avtordan 202 shyǵarma kelip túsken. О́z kezeginde oqyrmandar ózine unaǵan týyndyǵa onlaın túrde daýys bergen. Báıge qorytyndysyna sáıkes, «Jyldyń úzdik balalar shyǵarmasy» atalymynda Nurbek Nurjanuly, «Jyldyń úzdik poezııasy» atalymynda Altynbek Mersadyq, «Jyldyń úzdik prozasy» atalymynda Beken Ybyraıym, «Jyldyń úzdik satırasy» atalymynda Ashat О́mirbaev, «Jyldyń úzdik fantastıka jáne detektıv shyǵarmasy» atalymynda Baqyt Jamalıeva, «Jyldyń úzdik kınossenarııi jáne dramatýrgııasy» atalymynda Sharıdııar Ýálıhanov jeńimpaz atandy.
Uıymdastyrýshylar alqasy báıgede baǵy janǵan úzdikterge estelik syılyqtar men aqshalaı syıaqy tabystady. Jeńimpazdar arasynan 1 mln teńgelik bas júlde «Ýran kenishi» atty týyndysy úshin Beken Ybyraıymǵa buıyrdy. Buǵan qosa, jyl sońynda qatysýshylardyń úzdik ádebı shyǵarmalary jeke jınaq túrinde oqyrmanǵa jol tartpaq.
«Ádebıet – ulttyń jany. Qazirgi jaǵdaıda qalamgerlerdiń shyǵarmashylyǵyn yntalandyryp, túrli týyndylardyń sapasy men deńgeıin irikteıtin osyndaı baıqaýlar mindetti túrde qajet. Bul baıqaýdyń bir ereksheligi kópshilikke belgisiz jas jazýshylardyń atyn shyǵaryp, olarǵa metarıaldyq jáne moraldyq qoldaý kórsetýinde. Sondyqtan da biz «Altyn qalam» baıqaýynyń uıymdastyrýshylary men qoldaýshylaryna alǵysymyzdy jetkizemiz», dedi baıqaý laýreaty Beken Ybyraıym.
Aıta ketý kerek, «Altyn qalam» – usynylǵan týyndylarǵa taǵaıyndalǵan qazylar emes, oqyrman qaýym ózderi tikeleı baǵa bere alatyn Qazaqstandaǵy alǵashqy ádebı júlde. Osy oraıda sharaǵa qoldaý bildirgen Nurlan Smaǵulov qorynyń dırektory Aıdyn Sultanov: «Kitap bul rýxanı baılyqtyń kilti. Kitap oqyǵan adam bilim kókjıegi keń, tili baı, mádenıetti, jan-jaqty jáne pikirin erkin jetkize alytyny belgili. Jalpy jaqsy kitap oqý ómirde jeke tulǵa bolyp qalyptasýǵa kómektesedi. Sondyqtan da biz osy baǵyttaǵy «Altyn qalam» sekildi mádenı-aǵartýshylyq bastamalardy qashanda qoldaımyz», dep atap ótti.
Úsh aıǵa sozylǵan daýys berý qorytyndysyna saı ár atalym boıynsha alty shyǵarma tańdap alynyp, oqyrmandar tarapynan eń kóp upaı jınaǵan shyǵarmalar jáne qazylar nazaryna ilingen týyndylar saıystyń ekinshi kezeńine ótken. Aqtyq irikteý satysynda qazylar alqasy árbir nomınasııa boıynsha jeńimpazdardy jasyryn daýys berý arqyly anyqtaǵandaryn aıtady.
«Saıys barysynda ádebı shyǵarmalardyń avtorlary kórsetilgen joq. Bul baıqaýdyń barynsha ádil ótýine septıgin tıgizedi. Memleket basshysy: «Kitap oqý – rýhanı kemeldenýdiń kózi. Qazirgi ýaqyt – sekýnd saıyn jańarǵan aqparat zamany. Altyn ýaqytymyzdy paıdaly isterge jumsaǵanymyz jón», dep kópshilikti kitap oqýǵa yntalandyrý kerek ekenin sondaı-aq, qazaq tilin damytý árqashan memlekettik saıasattyń basym baǵyty bolyp qala beretinin atap ótken edi. «Altyn qalam» ádebı baıqaýy bul bastamany barynsha qoldaıdy. Sondyqtan bıyl biz qazaq tildi avtorlardyń shyǵarmalaryn kópke tanystyrýdy jón kórdik. О́nerdiń ishindegi eń bir qadirli de qasıettisi – kórkem ádebıet. Qazaq ádebıetiniń tuǵyryn bıiktete túsetin osyndaı izgi sharalar kóbeıe bersin», deıdi ádebı baıqaýdy uıymdastyrýshylardyń biri Kenje Jumanuly.
ALMATY