Astanada «Jaıly mektep» ulttyq jobasy aıasynda 24 mektep salynady. Bul týraly Ortalyq kommýnıkasııalar qyzmetinde ótken baspasóz máslıhatynda Astana qalasynyń ákimi Jeńis Qasymbek málimdedi, dep habarlaıdy Egemen.kz.
«Jyl saıyn qalada mektep jasyndaǵy balalardyń sany orta eseppen 20 myń adamǵa artyp keledi. Máseleni sheshý úshin jyl basynan beri 18 mektep, onyń ishinde 11 «jaıly» mektep paıdalanýǵa berildi. Jalpy, «Jaıly mektep» ulttyq jobasyn júzege asyrýdyń arqasynda eki aýysymda 90 myń oqýshyǵa arnalǵan 24 mektep salynady. Biz aldaǵy jyldarǵa negiz daıyndap jatyrmyz. Máselen, kelesi jyly taǵy 20-ǵa jýyq mektep salyp, paıdalanýǵa berýdi josparlap otyrmyz», dedi Jeńis Qasymbek.
Sonymen qatar qala ákimi elordada 2029 jylǵa deıin 60 memlekettik balabaqsha salý josparlanyp otyrǵanyn aıtty. Birinshi kezeń aıasynda 3000 oryndyq 10 balabaqshanyń qurylysy bastalǵan. Sondaı-aq 17 jekemenshik balabaqsha salynyp jatyr.
Jeńis Qasymbektiń aıtýynsha, Memleket basshysy 2029 jylǵa deıin zamanaýı 15 Oqýshylar saraıyn salý mindetin qoıdy. Onyń ekeýi jumys istep tur, úsh nysannyń qurylysy júrgizilip jatyr, qalǵandary jobalyq satyda.