Qazaq ulttyq qyzdar pedagogıkalyq ýnıversıtetinde «Otbasylyq zorlyq-zombylyqtyń aldyn alýdaǵy zamanaýı psıhologııalyq kózqarastar: teorııa jáne tájirıbe» atty halyqaralyq ǵylymı-tájirıbelik konferensııa ótti.
Is-sharany QyzPU rektory, Prezıdent janyndaǵy Áıelder isteri men otbasylyq-demografııalyq saıasat jónindegi Ulttyq komıssııa múshesi Gúlmıra Qanaı ashty. Konferensııa taqyrybynyń ózektiligin aıta otyryp, rektor bıyl 50 jyl tolyp otyrǵan psıhologııa kafedrasynyń mańyzyna toqtalyp ótti.
Jıyn barysynda UǴA akademıgi Zarema Shaýkenova:
«Búgingi kúni «psıhologııa» qoǵam úshin asa mańyzdy jáne ózekti mamandyqqa aınalyp otyr. Ásirese, bilikti mamandardy daıarlaý erekshe nazar aýdarýdy qajet etedi. О́tken jyly «Amanat» partııasy halyqqa psıhologııalyq kómek kórsetýdiń tıimdi ınstıtýtyn qurý máselesine erekshe nazar aýdardy. Jyl boıy Qazaq ulttyq qyzdar pedagogıkalyq ýnıversıtetiniń psıhologııa kafedrasynyń qoldaýymen osy baǵytta belsendi jumystar istelip keledi. Konferensııaǵa elimizden, sondaı-aq Estonııa, Qyrǵyzstan jáne Túrkııa elderinen qatysqan mamandar bala tárbıesi men ata-analarmen jumys isteý salasyndaǵy tájirıbesimen bólisýi, salada týyndap otyrǵan birqatar máselelerdiń aldyn alýǵa, sheshimin tabýǵa yqpal etedi. Is-shara stýdentter úshin de paıdaly aqparatqa toly ári bolashaq maman ıeleri úshin mazmundy tájirıbe alańy bolyp otyr» dep atap ótti.
Qazaq ulttyq qyzdar pedagogıkalyq ýnıversıtetiniń professory, psıhologııa ǵylymdarynyń doktory Horlan Sherıazdanova ýnıversıtettiń psıhologııa kafedrasynyń otbasy psıhologııasyn damytýǵa qosqan úlesi men tarıhyna toqtaldy.
«Men psıhologııa kafedrasynda qyzmet etip kele jatqanyma 45 jyl boldy. Psıhologııa mamandyǵy ýnıversıtettiń bilim berý júıesine 1997 jyly qosyldy. Sol ýaqyttan beri joǵary bilikti psıholog mamandaryn daıarlap keledi. Psıhologııa mamandarynyń óz kásibine degen súıispenshiligin arttyrýǵa, sondaı-aq elimiz úshin joǵary dárejeli mamandardy daıarlaýǵa óz úlesimizdi qostyq. Psıhologııa kafedrasy 50 jyl ishinde mańyzdy jumystar atqardy. Kóptegen memlekettik jobalarǵa qatysyp, olardy bilim berý júıesine engizdik. Bul jetistikter kafedranyń kásibı sheberligi men ujymdyq eńbeginiń nátıjesi» deıdi Horlan Sherıazdanova.
Halyqaralyq ǵylymı-tájirıbelik konferensııada elimizge belgili ǵalymdar jáne sheteldik sarapshylar, memlekettik organdar men azamattyq qoǵam ókilderi qatysyp, otbasylyq zorlyq-zombylyqtyń ózekti máselelerin, sebepteri men saldaryn, aldyn alý ádisterin talqylady.
Bul shara otbasylyq zorlyq-zombylyq máselesin teorııalyq turǵydan talqylap, ony sheshýdiń zamanaýı ádisterin tájirıbelik deńgeıde qarastyrýǵa baǵyttaldy. Konferensııa halyqaralyq tájirıbe almasý men qaýipsiz orta qurýǵa, daǵdarystyq jaǵdaılardyń aldyn alýǵa jáne sapaly psıhologııalyq kómek júıesin damytýdy maqsat etedi.
ALMATY