15 jeltoqsanda UQK Qostanaı oblysy boıynsha departamenti prokýratýranyń úılestirýimen sıntetıkalyq esirtki óndiretin jasyryn zerthana áreketiniń jolyn kesti, dep habarlaıdy Egemen.kz.
Psıhotroptyq zattardy daıyndaý kezinde Qazaqstannyń eki azamaty ustalyp, sot sanksııasymen qamaýǵa alyndy.
«Tintý barysynda 2 kelige jýyq daıyn «mefedron» psıhotroptyq zaty, sondaı-aq zerthanalyq jabdyqtar men esirtki daıyndaýǵa arnalǵan prekýrsorlar tárkilendi. QR Qylmystyq kodeksiniń 297-baby 3-bóliginde kózdelgen qylmys belgileri boıynsha sotqa deıingi tergep-tekserý júrgizilip jatyr», delingen UQK habarlamasynda.
Qylmystyq-prosestik kodekstiń 201-babynyń 1-bóligine sáıkes ózge aqparat jarııa etýge jatpaıdy.