Búgin Úkimet otyrysynda Energetıka mınıstri Almasadam Sátqalıev AES qurylysyn qoldaý maqsatynda otandyq kolledjder bazasynda ashylatyn jańa mamandyqtardy atady, dep jazady Egemen.kz.
Mınıstrdiń aıtýynsha, elimizdegi kolledjderde dozımetrıst, gaztýrbına slesary, AES jabdyqtardy jóndeý mamany, aqparattyq tehnologııalar salasyndaǵy mamandardy oqytý bastalady.
Qazaqstanda AES salý jobasy boıynsha 2030 jylǵa qaraı 5 myńǵa jýyq adam, al 2032 jyly qurylystyń sharyqtaý kezeńinde 10 myńǵa jýyq maman jumys oryndarymen qamtamasyz etilmek.
«AES-ti paıdalaný kezeńinde joba keminde 2 myń adamdy jumys oryndarymen qamtamasyz etedi. Jańa jobalardan basqa, qazir jumys istep turǵan OEK kásiporyndarynda 2025-2029 jyldar kezeńinde kadrlarǵa jalpy qajettilik qosymsha 16 myńǵa jýyq jumys ornyn quraıdy», dedi Almasadam Sátqalıev.
Bıyl energetıka salasynda jańa mamandyqtar boıynsha 4 kásibı standart ázirlenedi. Atom salasynda 29 kásibı standart jańartylmaq.
Energetıka úshin kadr daıarlaýdy 40 joǵary oqý orny men 215 kolledj júzege asyrady. Onda elektr energetıkasy, jylý energetıkasy, jańartylatyn energııa salasyndaǵy 7 mamandyq boıynsha 19 myńǵa jýyq stýdent oqıdy.
«Elektr generasııasy jańa nysandarynyń qurylysyn, tutynýdyń belsendi ósýin jáne ekonomıkanyń damýyn eskere otyryp, 2030 jylǵa deıin suranysqa ıe mamandyqtardyń tek energetıkaǵa degen qajettiligi 20 myńnan asady dep boljanyp otyr. AES qurylysyn qoldaý maqsatynda otandyq kolledjder bazasynda AES úshin personal daıarlaý isi qolǵa alynady», dedi Energetıka mınıstri.