Májilis depýtaty Snejanna Imasheva Batys Qazaqstan oblysynda jumys saparymen júr. Ol Oral qalasyndaǵy Derqul aýylyndaǵy «Jaıly mektep» respýblıkalyq jobasy aıasynda salynǵan №51 jalpy bilim beretin mekteptiń jumysymen tanysty, dep habarlaıdy Egemen.kz Májilistiń baspasóz qyzmetine silteme jasap.
Aıta keteıik, mektep 1500 oqýshyǵa eseptelgen, zamanaýı qural-jabdyqtarmen jabdyqtalǵan. Nysannyń jalpy quny 7,8 mlrd teńgeni quraǵan. Nysannyń jobalaýshysy «AQMOL project» jaýapkershiligi shekteýli seriktestigi bolsa, qurylystyń bas merdigeri - «KazConstuction Group» jaýapkershiligi shekteýli seriktestigi.
Depýtatty bilim ordasynyń jumysymen №51 orta mekteptiń dırektory, «Bilimdegi 1000 ózgeris kóshbasshysy» baǵdarlamasyny múshesi Jaqsyǵalı Jumabaı tanystyrǵan. Onyń aıtýynsha, olarǵa oqýshylar úsh aýysymdy №49 orta mektepten aýystyrylǵan. Búginde 1200-den astam bala jańa, jaıly mektepte bilim alyp jatyr.
«Mekteptiń óte jaqsy jabdyqtalǵanyna, zamanaýı aspaptarmen qamtylǵanyna jáne balalarǵa jaıly kabınetterdiń daıyndalǵanyna qýanyshtymyn. Mundaı formattaǵy mektepter barlyq qalada, aýyldyq okrýgte bolýy kerek dep esepteımiz. Memleket basshysy jýyrda «Ana tili» gazetine bergen suhbatynda aıtqandaı, aldaǵy ýaqytta respýblıka boıynsha 460 myń oqýshyǵa arnalǵan 217 jaıly mektep salý josparlanǵan. Depýtattar bul qurylystyń sapaly ári ýaqytyly júrgizilýin basty nazarda ustaıdy», dedi Snejanna Imasheva.
Aıta keteıik, oqýshylardyń oryn tapshylyǵy máselesin sheshý – «Amanat» partııasynyń saılaýaldy baǵdarlamasynyń bir tarmaǵy.