2024 jyly Qazaqstanda 18,96 mln sharshy metr turǵyn úı salyndy. Bul – Qazaqstan táýelsizdik alǵannan beri turǵyn úı qurylysyndaǵy rekordtyq kórsetkish, dep habarlaıdy Egemen.kz QR Indýstrııa jáne qurylys mınıstrliginiń baspasóz qyzmetine silteme jasap.
«2024 jyldyń qorytyndysy boıynsha 172 089 baspana paıdalanýǵa berildi. Onyń 39 064 jeke úı. О́ńirler arasynda Shymkent qalasy, Pavlodar, Túrkistan jáne Qyzylorda oblystary qurylys qarqyny boıynsha kósh bastap tur», delingen habarlamada.
Sondaı-aq jalǵa beriletin memlekettik turǵyn úılerde turatyn 71 myńǵa jýyq azamatqa páterlerin jekeshelendirýge múmkindik berildi. Jaldamaly turǵyn úı ıeleriniń kópshiligi halyqtyń áleýmettik osal toptary, UOS ardagerleri, múgedektigi bar azamattar, kóp balaly otbasylar, jetim balalar jáne t.b.
Áleýmettik osal toptar sanatyndaǵy muqtaj azamattar úshin ákimdikter 20 myńnan astam páter satyp aldy. 13 myńǵa jýyq otbasy alǵash ret jeke baspananyń ıesi atandy.
Odan bólek, 2300 azamatqa ıpoteka boıynsha bastapqy jarnany jabý úshin turǵyn úı sertıfıkattary túrinde 2,6 mlrd teńge bólinip, 10,4 myń azamatqa turǵyn úıdi jalǵa alǵany úshin jaldaý aqysynyń bir bóligin jabý úshin turǵyn úı tólemderi sýbsıdııalandy.
«Naýryz» jáne «Otaý» memlekettik baǵdarlamalary aıasynda 2024 jyly 10 myńǵa jýyq otbasy turǵyn úı jaǵdaıyn jaqsartty. 64 myńǵa jýyq otbasyn qoldaýǵa 1 trln. teńge bólingen. Memleket jaldaý aqysyn sýbsıdııalaý jáne jeńildetilgen ıpotekalyq nesıeler berý boıynsha qoldaý kórsetýdi jalǵastyrady.
«2025 jyly elimizde 19 mln. sharshy metr nemese 175 myń turǵyn úı, 2029 jylǵa qaraı 111 mln. sharshy metr salý josparlandy», delingen habarlamada.