Adam óltirý, turǵynjaıǵa qolsuǵylmaýshylyqty buzý jáne zańsyz qarý aınalymy úshin qylmystyq jaýaptylyqqa tartý maqsatynda Qazaqstannyń eki azamaty Reseıden ekstradısııalandy, dep habarlaıdy Egemen.kz Bas prokýratýranyń baspasóz qyzmetine silteme jasap.
Anyqtalǵandaı, kúdiktiler 2023 jyldyń qańtarynda Shymkent qalasynda basqa úsh adammen birlesip, jeke arazdyq negizinde tanysyn óltirýdi josparlaǵan.
«Oılaryn júzege asyrý maqsatynda kúdiktiler tapansha, metall shybyqtar jáne bıtalarmen qarýlanyp, qolǵap pen maska kıip, túngi ýaqytta jábirlenýshiniń úıine kelgen. Olar terezelerdi syndyryp, úıge kirip, jábirlenýshige asa qatygezdikpen kóptegen dene jaraqattaryn keltirgen. Keıin úıdegi basqa adamdardy uryp-soǵyp, jábirlenýshi ómir belgilerin bermegenine kóz jetkizgen soń, oqıǵa ornynan boı tasalaǵan. Jábirlenýshi aýyr dene jaraqaty saldarynan jedel járdem kóliginde qaıtys bolǵan», delingen habarlamada.
Kúdiktilerdiń ekeýi izin sýytpaı ustalyp, ártúrli jazalarǵa tartylǵan. Al qalǵan úsh kúdikti elden qashyp, halyqaralyq izdeýge jarııalanǵan.
«2024 jyldyń mamyrynda sybaılastarynyń biri kórshiles elden ekstradısııalanyp, sottaldy. Qalǵan eki izdeýdegi kúdikti ótken jyldyń shildesinde Reseı Federasııasynyń Máskeý oblysynda ustalyp, Qazaqstan Bas prokýratýrasynyń suraýy boıynsha elge ekstradısııalandy. Qazirgi tańda kúdiktiler tergeý ızolıatoryna qamaldy. Aıyptalyp otyrǵan qylmystardy jasaǵany úshin olarǵa 15 jyldan 20 jylǵa deıingi merzimge nemese ómir boıyna bas bostandyǵynan aıyrý jazasy qarastyrylǵan», dep habarlady Bas prokýratýranyń baspasóz qyzmeti.
Aıta keteıik, atalǵan qylmystarǵa qatysy bar barlyq tulǵalar áshkerelendi.