ATYRAÝ. 18 maýsym. Atyraýda 140 turǵyny bar otbasylyq jataqhananyń úsh qabaty qulap, turǵyndary baspanasyz qalǵan edi. Abyroı bolǵanda, eshkim zardap shekken joq. Baspanasyz qalǵandardyń birazy kóp uzamaı jańa páterge qonys aýdardy. Dálirek aıtqanda, olarǵa «Qoljetimdi baspana-2020» memlekettik baǵdarlamasymen turǵyzylǵan jańa turǵyn úıden páter berildi. Bul týraly egemen.kz tilshisi habarlady.
«Elbasy Nursultan Nazarbaevtyń tapsyrmasyn oryndaý maqsatynda oblysta aýqymdy jumystar atqarylýda, –dedi oblys ákimi Baqtyqoja Izmuhambetov. – Sonyń biri – jańa turǵyn úı. Jańa baspanadan 100 páterdiń kilti ata-anasynyń qamqorlyǵynsyz qalǵan balalarǵa tıesili bolyp otyr. Mundaı joba jalǵasatyn bolady. Bıyl oblysta 1 734 páterli 27 turǵyn úı tapsyrylady. Sonyń ishinde oblys ortalyǵynda 1 194 páterli 18 turǵyn úı paıdalanýǵa beriledi. Shilde aıynda jas otbasylarǵa arnalǵan 90 páterlik úıdiń qurylysy aıaqtalady dep josparlanýda. Sondaı-aq, ótken jyldan bastap aýdandarda da kóp qabatty úılerdiń qurylystary bastaldy».
Jańa baspanadaǵy bir bólmeli páterler ata-anasynyń qamqorlyǵynsyz qalǵan 100 jasqa, sonymen birge, jaqynda qulaǵannan keıin apatty dep tanylǵan Baımuqanov kóshesindegi №39 úıdiń 65 páter ıesine, sondaı-aq, múgedekter men aýǵan soǵysy ardagerlerine berildi.
«Jataqhanamyz qulaǵanda dalada qalamyz ba degen qaýpi tóndi. Oblys basshylyǵy qıyn jaǵdaıymyzǵa túsinistikpen qarap, shuǵyl túrde máseleni sheshýge kiristi. Búgin taǵy bir qoldaýdyń kýási bolyp otyrmyz. Sheksiz qýanyshtymyz», – dep jańa páterge ıe bolǵan Aqjamal Mahmutqyzy qýanyshyn jasyra almady.
Joldasbek Shópeǵul.
Derek: egemen.kz.
Sýret: Rahym Qoılybaev.