PETROPAVL. 18 maýsym. Soltústik Qazaqstan oblysyna az ulttar isteri jónindegi EQYU joǵarǵy komıssary Astrıd Týrs keldi. Bul týraly ákimdiktiń baspasóz qyzmeti habarlady.
Delegasııany qarsy alǵan oblys ákimi Erik Sultanovpen áńgime barysynda Týrs hanymnyń óńirge saparynyń maqsaty Qazaqstan halqy Assambleıasynyń 20 jyldyǵyna arnalǵan konferensııaǵa qatysýy ekeni belgili boldy. Erik Hamzauly mártebeli qonaqty oblystyń ekonomıkalyq-áleýmettik, saıası-mádenı jańalyqtarymen tanystyrdy. Prezıdent N.Nazarbaevtyń tikeleı bastamasymen qurylǵan saıası qurylymnyń qazaqstandyqtardy ortaq arnaǵa biriktirýshilik, jumyldyrýshylyq rólin, alǵa 5 ınstıtýttyq reformany júzege asyrý maqsatyn qoıyp otyrǵanyn atap kórsetti. Delegasııa músheleriniń nazaryn óńirde barlyq etnostardyń mádenıetin, salt-dástúrin, tilin úırenýge jan-jaqty múmkindikter jasalǵanyna aýdardy. Mysaly, Dostyq úıinde polıak, nemis, ıvrıt tilderiniń kýrstary qurylǵan. Petropavl qalasyndaǵy № 17 ulttyq jańǵyrý mektebinde 9 bólim bar, Olarda balalar ázerbaıjan, armıan, káris, qazaq, nemis, ýkraın, polıak, tatar, sheshen tilderi men mádenıetin oqyp-úırenedi.
О́z kezeginde joǵarǵy komıssar Qazaqstanǵa osymen ekinshi ret arnaıy kelip otyrǵanyn, Assambleıa tájirıbesi qyzyqtyratynyn, EQYU men Qazaqstan arasynda ortaq túsinistik ornaǵanyn, ózara qarym-qatynas tıimdi damyp kele jatqanyn jetkizdi.
«Biz Qazaqstannyń halyqtar birligine erekshe kóńil bólip otyrǵanyn joǵary baǵalaımyz. Bul jumystardyń qalaı atqarylyp jatqanyn etnomádenı birlestikter arqyly jaqsy bilemiz», dedi ol.
Resmı shara aıaqtalǵannan keıin kezdesýler uıymdastyryldy.
О́mir Esqalı.
Derek, sýret: Soltústik Qazaqstan oblystyq ákimdiginiń baspasóz qyzmeti.