Memleket basshysynyń qatysýymen ótken Úkimettiń keńeıtilgen otyrysynda elimizdiń byltyrǵy damýynyń qorytyndylary shyǵarylyp, jaqyn arada sheshýdi qajet etetin negizgi mindetter aıqyndaldy. Rasynda, bul el Prezıdentiniń negizgi baıandamasy boldy. Kún tártibindegi ózekti taqyryptar nazardan tys qalmady.
Jumystyń negizgi baǵyttarynyń qatarynda ekonomıkany ártaraptandyrý, ınfraqurylymdyq damýdyń jańa deńgeıine kóshý, sıfrlyq tehnologııalardy júıeli engizý, agroónerkásiptik keshenniń áleýetin nyǵaıtý, salyq-bıýdjettik saıasatty reformalaý, mańyzdy jobalarǵa qarjylyq qoldaý kórsetý, áleýmettik salany odan ári damytý ataldy.
Elde energııa tapshylyǵy kúsheıgen tusta keleshekti aıqyndaıtyn birqatar mańyzdy qadam jasaýǵa týra keledi. Máselen, zamanaýı tásilderdi engizý, tabıǵı resýrstardy utymdy paıdalaný, atom energetıkasyna zeıin qoıý el ekonomıkasynda turaqtylyqty qamtamasyz etedi. Sondyqtan Úkimet jańa tarıftik saıasatty júzege asyrýdy jalǵastyrýy kerek.
Kontrabandalyq janar-jaǵarmaıdy shyǵarý faktileri birneshe ret aıtyldy. Bul elimizdiń ekonomıkasy úshin óte aýyr táýekelder týǵyzyp otyr. Máseleni Májilis depýtattary da birneshe ret kóterdi.
Prezıdenttiń otyrystaǵy «energetıkalyq» tezısteri men tapsyrmalary naqty jáne perspektıvaly boldy. 2027 jyly Úkimet Batys aımaqtyń elektr jelilerin elimizdiń biryńǵaı elektr energetıkalyq júıesimen biriktirýdi aıaqtaýy kerek. Ońtústik aımaqtyń elektr jelilerin nyǵaıtý jobasyn iske asyrýdy jedeldetý qajet.
2026 jyly «Beıneý – Bozoı – Shymkent» gaz qubyrynyń ekinshi tarmaǵy qurylysynyń birinshi kezeńin aıaqtaý kerek. Memleket basshysy Jańaózen men Qashaǵandaǵy gaz óńdeý zaýyttarynyń, sondaı-aq Túrkistan oblysyndaǵy bý-gaz negizindegi elektr stansasynyń qurylysyn belgilengen merzimde aıaqtaý mindetin qoıdy. Jasyratyny joq, búginde qarjy tapshylyǵynan kóptegen joba iske qosyla almaı jatyr. Endi Prezıdent eleýli jobalarǵa qarjylaı qoldaý kórsetý taqyrybyn erekshe atap ótken soń, olar ýaqtyly aıaqtalady degen úmit bar. Birqatar naqty shara qolǵa alynýǵa tıis ár salada azamattardyń ál-aýqatyn arttyrý basty maqsat sanalady.
Dúısenbaı TURǴANOV,
Májilis depýtaty