Tam-tumdap bolsa da, shetel asyp, aýdarma arqyly ózge oqyrmanǵa jetip jatqan ádebı shyǵarmalarymyz barshylyq. Sonyń biri – Ábish Kekilbaıulynyń «Ańyzdyń aqyry» romany. Bul roman 2016 jyly Qazaq PEN-klýbynyń jetekshiligimen Nıý-Iorktegi «Metropolitan Classics» baspasynan jaryq kórgen. Birde osy romandy AQSh-tyń Djordj Vashıngton ýnıversıtetiniń professory, qoǵamtanýshy ǵalym Krıstofer Kojm myrzaǵa berip, oqyp shyǵýyn ótindim.
Araǵa eki aı salyp álgi professor kabınetine shaqyrdy. Ústeliniń ústinde «Ańyzdyń aqyrynyń» aǵylshynsha nusqasy tur. Sózdi aldymen ózi bastady: «Maǵan osyndaı keremet shyǵarmany oqýǵa usynǵanyńa alǵys aıtamyn. Bir aıdan asa ýaqyt ishinde, bul romandy oqyp shyqtym. Maǵan avtordyń keń tynysy, ár keıipkerin sátti sýrettegeni unady. Biz shyny kerek, Ortalyq Azııanyń, onyń ishinde Qazaqstan qalamgerleriniń shyǵarmashylyǵymen tanys emespiz. Bárimiz bir álemde ómir súrip jatyrmyz, sol úshin de bir-birimizdi bilýge qushtar bolǵanymyz jón. Men osy kitapty qolǵa alǵanda, ishinen ózime kerekti mádenıetter toǵysyn, ózim eshqashan kórmegen eldiń jaǵdaıymen tanysarmyn degen úmitim bolǵan edi. Sol úmitim aqtaldy. Ábish Kekilbaıuly bir ǵana ámirshiniń ómiri arqyly búkil adamzattyq máseleni qozǵap otyr. Biz, qoǵamtanýshylar, ár oqyǵan kitabymyzdan osylaı mańyzdy máselelerdi sezinemiz. Osydan biraz buryn óziń bergen Muhtar Áýezovtiń «Amerıka áserlerinen» kóp aqparat aldym. Mine, qazaq ádebıetinen ekinshi kitapty bitirdim. Endi qazaq qalamgerleriniń aǵylshynshaǵa aýdarylǵan kitaptary bolsa, maǵan berersiń», degen oıyn bildirdi. Osylaı az bolsa da, jaqsy romandardy aýdaryp, sheteldik zııaly qaýymǵa oqýǵa berýdi dástúrge aınaldyrsaq, ádebıetimiz ben mádenıetimizdi nasıhattaýǵa sep bolar edi.
Professordyń jyly sózinen keıin meniń boıymdy qýanysh kernedi. Kelesi kúni oǵan Ánýar Álimjanovtiń «Ustazdyń oralýy» atty romanyn aparyp berdim. Ony da oqyp, pikirin aıtatyn bolyp kelisken. Elektrondy poshtama anda-sanda kóz salyp, habar kútip júrmin. Bir kúni «Ustazdyń oralýy» týraly da jaqsy lepesin jazyp jiberetin shyǵar.