Sý qoımasynyń qurylysy Baızaq pen Talastyń sý tapshylyǵy máselesin sheshýi tıis, dep habarlaıdy Egemen.kz QR Sý resýrstary jáne ırrıgasııa mınıstrliginiń baspasóz qyzmetine silteme jasap.
Atalǵan joba alǵash ret 2020 jyly talqylanǵan. Sol kezde oblys ákimdiginiń baspasóz qyzmeti Talas pen Baızaq aýdandarynyń shekarasynda syıymdylyǵy 11 mıllıon tekshe metr sý qoımasyn salý josparlanǵanyn habarlaǵan edi.
Sý resýrstary jáne ırrıgasııa mınıstrligi Islam Damý Bankimen yntymaqtastyq aıasynda Jambyl oblysynda jańa sý qoımasyn salýdy josparlap otyr. Sondaı-aq, 76 kanal men jumys istep turǵan 1 sý qoımasy jóndeledi.
«Baızaq aýdanynda - 18 kanal, Talas aýdanynda – 1 kanal, Sarysý aýdanynda – 11 kanal, Merki aýdanynda – 1 kanal, Shý aýdanynda – 45 kanal qalpyna keltiriledi. Al, Qordaı aýdanyndaǵy Qaraqońyz sý qoımasyna rekonstrýksııa jasalady. Baızaq aýdanynda jańadan «Aqmola» sý qoımasy salynady», delingen habarlamada.
Mınıstrliktiń málimetinshe, sý qoımalaryn rekonstrýksııalaý jáne salý 9300 gektar jerge sý berý sapasyn jaqsartady. Al, 76 kanaldy jóndeý oblystaǵy 24,7 myń gektar egis alqabyn sýmen jabdyqtaýdy jaqsartady.
«Sonymen qatar, bıyl óńirde uzyndyǵy 67 shaqyrym bolatyn 7 kanaldyń ýchaskelerin jóndeý josparlanyp otyr. Byltyr 69 shaqyrym kanal jóndeýden ótti. Bul 13 myń gektar egis alqabyn sýarmaly sýmen qamtý sapasyn jaqsartady», deıdi sý sharýashylyǵy nysandaryn damytý departamentiniń basshysy Qudaıbergen Qorǵanbaev.