Memleket basshysy Qasym-Jomart Toqaev otandyq bıznes ókilderimen kezdesýde Úkimetke qosymsha qun salyǵy (QQS) máselesin taǵy da pysyqtaýdy tapsyrdy, dep habarlaıdy Egemen.kz.
Prezıdent kez kelgen reformany jan-jaqty saraptap, baıyppen júrgizý qajettigin atap ótti. Bul rette QR Parlamenti Senatynyń depýtaty Gennadıı Shıpovskıh ekonomıka salalarynyń erekshelikterin eskere otyryp, túrli nusqalar ázirleý mańyzdy ekenine toqtaldy.
«QQS mólsherlemesi saralanyp belgilenýi tıis. Bul sheshim bilikti sarapshylardyń, kásipkerlerdiń jáne depýtattardyń pikirine qulaq asa otyryp, naqty esepteýler negizinde qabyldanýy qajet. Qazirgi usynylǵan mólsherleme tym joǵary. Bul qoǵamda qyzý talqylanyp, túrli pikirtalas týdyrdy. Degenmen, bul aldyn ala qarastyrýǵa usynylǵan nusqa ekenin eskerý kerek. Sondyqtan Úkimettiń bul baǵyttaǵy jumysy bıznes, qoǵam, kásipkerler jáne sarapshylarmen birlese otyryp jasalýy tıis», dedi depýtat.
Onyń pikirinshe, Úkimet, myqty sarapshylar jáne depýtattar bul máseleni muqııat taldap, durys sheshim qabyldaýy qajet.
«Maqsat – tıimdi sheshim tabý. Iаǵnı bızneske kedergi keltirmeıtin, qolaıly jaǵdaı jasaıtyn, sonymen qatar salyq tártibin kúsheıtip, bıýdjet kirisin arttyratyn ońtaıly joldy anyqtaý. Prezıdenttiń bul pikiri jáne usynysy óte oryndy. Sebebi jańa salyqtyq reforma el ekonomıkasyna tıimdi bolyp, eń bastysy – qarapaıym kásipkerlerge kedergi emes, kerisinshe qoldaýǵa baǵyttalýy qajet», dedi Gennadıı Shıpovskıh.