Mańǵystaýdyń Munaıly aýdanyndaǵy balabaqshalardyń birinde 8 bala eki ydystan bir qasyqpen tamaqtanyp otyrǵanyn ata-analary beınejazbadan kórip, jaǵa ustaǵan, dep habarlaıdy Egemen.kz.
«Almaty» telearnasy jazǵandaı, qyzynyń esimin atamaýdy ótingen ana búldirshinniń qoly shyǵyp ketkenin keshkisin ákesi balabaqshadan alyp ketýge barǵanda bir-aq bilgen. Jeke bóbekjaıǵa baryp júrgen kishkentaı qyzdyń qoly zaqymdalǵanyn dárigerler de rastady. Anasy sol kúni aýrýhanadan shyǵa sala mektepke deıingi bilim berý ortalyǵyna baryp, kamera jazbasyn qaraǵan. Nátıjesinde tárbıeshi balany qolynan julqyp, kóterip qalǵanyn kóredi.
Sondaı-aq kadrlarda bir dastarqan basynda 8 búldirshin otyrǵany kórinedi.
- Aldaryna eki sorpa ydysy qoıylǵan. Al tárbıeshisi jalań qolmen nandy týrap, sol ydysqa salyp beredi. Bergende de jeke-jeke emes, bir qasyqpen 8 balany birden tamaqtandyrady, - dep jazylǵan málimette.
Tirkelgen keleńsiz jaǵdaıǵa baılanysty bóbekjaı dırektory pikir bildirgen. Balabaqshanyń qos qyzmetkerine tártiptik jaza qoldanylyp, jumystan bosatylǵan. Al balalardyń as mázirine qatysty máseleni bylaı dep túsindirip berdi.
- Ol artyq ydys-aıaqty jýǵysy kelmeı, jumysyn jeńildetý úshin solaı jasaǵan. Sol kúni men jumysta bolmadym, jyldyń basy bolǵan soń balabaqshaǵa ózgerister engizeıin dep ortalyqtyń sharýasymen syrtqa shyǵyp kettim. Negizi bala sanyna qaraı kerek quraldar jetkilikti, tamaq ta az emes, - dedi jeke balabaqshanyń dırektory Raýshan Aıapbergenova.
Al aýdandaǵy bilim bóliminiń basshysy ata-ana quqyǵyn túsindirip, balabaqshaǵa qatysty qandaı shara qoldanylǵanyn jetkizdi.
- Bolǵan jaǵdaıǵa baılanysty qyzmetkerge arnaıy aıyppul salyndy. Qazir kemshilikterge baılanysty quzyrly organdarǵa shara qoldaný jóninde hat joldanǵan. Qazirgi tańda ol bala basqa balabaqshada tárbıelenip jatyr, - dedi Munaıly aýdany bilim bóliminiń basshysy Batyrbek Demokratuly.