Májilis depýtatty Maqsat Tolyqbaı «Amanat» partııasy qolǵa alǵan «Aýyl amanaty» baǵdarlamasynyń oryndalýyna baılanysty aıtylyp jatqan syn az emestigin aıtyp, Premer-Mınıstrdiń orynbasary – Ulttyq ekonomıka mınıstri Serik Jumanǵarınge depýtattyq saýal joldady, dep habarlaıdy Egemen.kz.
Depýtattyń aıtýynsha, ázirge, aýyl halqynyń tabysyn toltyrýǵa arnalǵan eldegi jalǵyz joba – osy bolǵandyqtan odan úmit kútetin el kóp. Biraq, sol eldiń bul jobaǵa aıtar ókpe-nazy da joq emes.
«Kásipten násibin tapqysy keletinderdi ákimdik áýre-sarsańǵa salýǵa daıyn. Áljýaz áleýmetke bıýrokratııa úsh-tórt aılap qujat jınatyp, tabanynan tozdyrady.
Jobany qarjylandyrý tetigi de qaryn ashtyrady. Negizi jobanyń basty maqsaty - 7 jylda 350 myń jumys ornyn ashyp, jyl saıyn keminde 20-25 myń turǵynǵa mıkronesıe berilý kerek. Biraq bıýdjet tapshylyǵyna baılanysty, byltyr jobaǵa bar bolǵany 20 mlrd. teńge bólingen. Buny eki dep qoıyńyz», dedi depýtat M.Tolyqbaı.
Depýtattyń pikirinshe taǵy bir ózekti másele kadr tapshylyǵy. Kooperatıvterde veterınar, zootehnık, mehanızator, agronom sııaqty mamandar jetispeıdi.
Sondaı-aq depýtat pılottyq aýyldar jobasy prınsıpin mindetti túrde qaldyrý qajet ekenin aıtty.
«Áıtpese, jobanyń máni joǵalady, joba tek kredıt beretin kezekti baǵdarlama retinde baıansyzdyń kúnin keshedi.
Árıne, osydan biraz buryn Prezıdent nazaryna usynylǵan Jambyl oblysyndaǵydaı barlyǵy baqýatty bolmaıtyny anyq. Biraq, pılottyq prınsıp toqtasa, onda aýyl kooperatıvterin qurýdyń, tıisinshe, lızıngke tehnıka berýdiń de qajeti bolmaı qalýy múmkin.
Eń qyzyǵy, kooperatıvtter qurý degen ne? Onyń mehanızmi qandaı? Buny jergilikti atqarýshy organdardyń ózi túsinbeı jatady. Sonda ony qarapaıym halyq qaıdan túsinedi?», dedi depýtat. Onyń aıtýynsha sol oraıda túsindirý jumystaryn shıratqan jón.
Depýtattyq saýalda sonymen qosa, aýyl halqynyń tabysyn kóterý úshin, turǵyndardy aýyl sharýashylyǵy boıynsha tehnologııalyq kartalarǵa oqytý máselesi óte ótkir bolyp turǵany aıtyldy.
«Buny Memleket basshysy Joldaýynda «Pılotty rejımde «Amanat» partııasynyń Merke aýdanynda ashqan «Agrosaýat» oqý ortalyǵyn barlyq aýdandarda ashýdy Úkimetke tapsyramyn», dedi. Biraq, bul tapsyrma boıynsha Úkimet te, óńir ákimderi de qylaýdaı sheshim qabyldamaǵan. Bul úkimetke, ákimdikterge syn», dedi Maqsat Tolyqbaı.
Depýtattyń aıtýynsha «Agrosaýat» ortalyǵyn iske qospaı, qalyptastyrmaı aýyl halqynyń tabysyn kóterý múmkin emes, bul – júıe qalyptastyratyn, bilmegenge úıretetin, bilgenge qoldaý bolatyn ortalyq.
«Sondyqtan, «Agrosaýat» oqý ortalyqtaryn ashý týraly mınıstrliktiń josparymen tez arada tanystyrýyńyzdy suraımyn», degen depýtat Maqsat Málikuly aýyl sharýashylyǵy salasyndaǵy budan da basqa birneshe máselelerdi qozǵady.