«AMANAT» partııasynyń basty mindeti – azamattardyń ózekti máselelerin sheshý jáne olardyń turmysyn jaqsartý boıynsha turaqty jumys júrgizý. Adamdardyń partııaǵa degen seniminiń kepili – osy. Bul týraly Májilis Spıkeri, «AMANAT» Tóraǵasy Erlan Qoshanov uıymdastyrýshylyq jıyn barysynda aıtty. Partııalyqtar ótken jyly atqarylǵan jumysty qorytyndylap, birqatar basym mindetterdi aıqyndady. Keńeske partııanyń óńirlik fılıaldary qosylyp, basqosý beıne konferens baılanys rejıminde ótti, dep habarlaıdy Egemen.kz
Jıyn barysynda «AMANAT» partııasynyń Tóraǵasy Memleket basshysy Qasym-Jomart Toqaev partııalyq jobalarǵa birneshe ret joǵary baǵa bergenine jáne jýyrda ótken Úkimettiń keńeıtilgen otyrysynda «Ákimder mektebi» jobasyn uıymdastyrýda partııanyń oń tájirıbesin taǵy bir ret aıryqsha atap ótkenine nazar aýdardy. Erlan Qoshanov muny partııa atqaryp jatqan jumystyń joǵary tıimdiliginiń kórsetkishi jáne árbir partııalyqqa erekshe jaýapkershilik júkteıdi dep atap ótti.
«Memleket basshysynyń aýqymdy reformalary tabysty jalǵasýda. Ekonomıkadaǵy, TKSh-daǵy jáne ózge de salalardaǵy burynnan kele jatqan máseleler sheshilýde. Azamattardy tolǵandyratyn kóptegen ótkir máselelerdiń beti ashylýda. Ol – tarıfterdiń ósýi, azyq-túliktiń qymbattaýy, janar-jaǵar maı baǵasynyń ósýi, QQS. Júıe quraýshy saıası kúsh retinde partııa óz jobalarymen, qabyldanyp jatqan zańdarymen azamattar kótergen máselelerdi sheshýge óz úlesin qosýy kerek. Partııa árkimniń jan dúnıesimen úndesetin qadamdar jasaı bilýge tıis. Bul – halyqtyń partııaǵa barynsha kóp qoldaý kórsetýiniń kepili», dedi Erlan Qoshanov.
Erlan Qoshanov «AMANAT»-tyń aldynda turǵan bıylǵy basym baǵyttarǵa toqtaldy. Olardyń qatarynda «Aýyl amanaty», «Ákimder mektebi» jáne t. b. partııalyq jobalardy júzege asyrýdy jalǵastyrý, jastarmen, ásirese aýyldaǵy jáne jumyssyz jastarmen júrgiziletin jumysty kúsheıtý, azamattarǵa ataýly kómek usyný, zańgerlik qoldaý kórsetý jáne taǵy da basqa sharalar. «AMANAT» partııasy tóraǵasynyń aıtýynsha, bul sharalar qoǵamnyń naqty suranysyna jaýap beredi jáne partııa tarapynan únemi nazar aýdarýdy talap etedi.
2,5 jyl boıy partııalyqtar «Jer amanaty» komıssııasy arqyly jerge qatysty ádildikti qalpyna keltirý máselesimen aınalysyp jatyr. Osy másele uzaq ýaqyt boıy qoǵamdy dúrliktirip keldi. Partııa osy jumysqa aralasqannan keıin ǵana bul saladaǵy pikirtalastar syndarly baǵytqa bet burdy. Osylaısha, 12 mln gektar jer memleket menshigine qaıtarylyp, onyń 5 mln-y azamattar arasynda bólindi. Partııanyń bastamasy boıynsha «Jaıylymdar týraly» jańa zań jobasy qabyldandy. Sol arqyly kóptegen máseleler júıeli túrde sheshimin taýyp jatyr. Atap aıtsaq, qoǵamdyq jaıylymdar uǵymy engizildi. Onda jerdi qunarlandyrý, konkýrstyq negizde ádil bólý, memleket tarapynan qarjylandyrý qadamdary jáne ózge de normalar men jumystar reglamentteldi.
Sonymen qatar qarjylyq saýattylyqty arttyrýǵa baǵyttalǵan «Qaryzsyz qoǵam» jobasy aıasynda eki jylda el aýmaǵynda 850 myń adam oqýdan ótti. Halyqtyń shamadan tys nesıe alýyn azaıtý boıynsha parlamenttik tyńdaýlar ótkizildi. Al Májilistegi partııa fraksııasynyń músheleri osy máselege qatysty bankterdiń emes, qarapaıym adamdardyń múddesin qorǵaıtyn túzetýler engizdi. Jalpy, «Qaryzsyz qoǵam» jobasy arqyly problemalyq nesıeler deńgeıi 2020 jylǵy 18%-dan 2024 jyly 7%-ǵa deıin tómendedi.
О́z kezeginde, «AMANAT» partııasy Batys Qazaqstan oblystyq fılıalynyń tóraǵasy Murat Muqaev «Aýyl amanaty» jobasy aıasynda 1200-den astam adam jeńildetilgen nesıe alǵanyn jáne bul qadam 1400 jumys ornyn qurýǵa múmkindik bergenin málimdedi. Soltústik Qazaqstan oblysy máslıhatyndaǵy partııa fraksııasynyń jetekshisi Irına Ektova depýtattar memlekettik organdarǵa 805 suraq joldaǵanyn, sonyń nátıjesinde Býlaev sý qubyryn qaıta jańǵyrtýǵa, «Jezqazǵan-Petropavl» tas jolyn jóndeýge jáne 46 medısınalyq nysan qurylysyn qarjylandyrýǵa qol jetkizilgenin atap ótti.
«Jastar Rýhy» Qyzylorda oblystyq fılıalynyń tóraǵasy Ásethan Baımurza IT-salasyn nasıhattaýǵa baǵyttalǵan konkýrs týraly aıtyp, onyń qorytyndysy boıynsha 4 jeńimpaz bilim grantyn ıelengenin jetkizdi. О́ńirde «Erikti – kómekke» jobasy sátti júzege asyp, volonterler turǵyndarǵa 109 senim telefony arqyly kómek kórsetip otyr.
Al Túrkistan oblysyndaǵy «Ortalyq» bastaýysh partııa uıymynyń tóraǵasy Danııar Kóbeev Jumysshy mamandyqtary jyly aıasynda stýdentter men áıelderge tiginshilik boıynsha tegin sheberlik synyptary uıymdastyrylǵanyn habarlady.
Jıyndy qorytyndylaı kele, «AMANAT» Tóraǵasy Erlan Qoshanov partııalyqtar Memleket basshysynyń barlyq bastamasyn, Prezıdentiniń «Ádiletti Qazaqstan: bárimiz jáne árqaısymyz úshin. Qazir jáne árdaıym» saılaýaldy baǵdarlamasyn, partııanyń «Halyqpen birge!» saılaýaldy baǵdarlamasyn, sondaı-aq partııalyq jobalardy iske asyrý jumysyn kúsheıtýge tıis ekenin atap ótti.
Sonymen qatar, partııa Tóraǵasy «AMANAT»-tyń Áıelder qanatynyń, «Jastar Rýhy» jastar qanatynyń qyzmetin jandandyrý jáne qoǵamda sıfrlyq gıgıenany ilgeriletý jóninde birqatar tapsyrma berdi.