Medısınalyq ınfraqurylymdy jańǵyrtý jáne onkologııalyq qyzmetti damytý sheńberinde Abaı oblysy Densaýlyq saqtaý basqarmasynyń «Iаdrolyq medısına jáne onkologııa ortalyǵynda» «Qazaqstan halqyna» qoǵamdyq qorynyń qoldaýymen SOMATOM go.Sim kompıýterlik tomografy jáne TrueBeam sáýlelik terapııa júıesi paıdalanýǵa berildi, dep jazady Egemen.kz.
Obyrmen kúreste ońtaıly qyzmet atqaratyn sáýlelik terapııa apparattary aldaǵy ýaqytta densaýlyq salasyn damytýǵa jol ashyp, óńir halqyna onkologııalyq sapaly qyzmet kórsetýge mańyzdy qadam basyp otyr.
«Biz árbir azamattyń sapaly jáne qazirgi zamanǵy medısınalyq, sonyń ishinde onkologııalyq kómekke qol jetkizýine jaǵdaı jasaýǵa umtylamyz. Bul apparatar kóptegen adamdardyń ómirin saqtap qalýǵa jáne qalalar men aýyldarda onkologııalyq aýrýlardy dıagnostıkalaý men emdeýdiń tıimdiligin arttyrýǵa kómektesedi degen senimdemin. Bul sonymen qatar qaterli isik aýrýynan tolyq saýyǵý múmkindigin arttyra otyryp, ony erte kezeńderde anyqtaýǵa kómektesedi. Osyndaı apparattar «Qazaqstan halqyna» qoǵamdyq qorynyń demeýshiligimen elimizdiń 5 óńirine jetkiziledi», deıdi atalǵan qordyń Basqarma tóraǵasy Lázzat Shyńǵysbaeva.
Medısınanyń damýynyń arqasynda saý tinderge barynsha az áser ete otyryp, onkologııalyq aýrýlardy neǵurlym dálirek dıagnostıkalaý jáne tıimdi emdeý múmkin bolǵany málim. Mysaly, SOMATOM go.Sim kompıýterlik tomografy sáýlelik terapııany dálme-dál josparlaý úshin isikterdi egjeı-tegjeıli kózben sholýǵa múmkindik beredi. Arnaıy túsirilgen keskinniń joǵary sapasyn saqtaı otyryp, sáýlelený dozasyn meılinshe azaıtady jáne em-dom sharasyn aǵzanyń tabıǵı fızıologııalyq prosesterin eskere otyryp júrgizý múmkin bolady.
«True Beam» sáýlelik terapııa júıesi tek qaterli jasýshalarǵa áser ete otyryp sáýlelenýdiń ınnovasııalyq ádisterin qoldanýǵa jáne serpindi qadaǵalaý tehnologııasynyń arqasynda eń kúrdeli jáne qozǵalmaly isikterdi emdeýge múmkindik beredi.
«Iske qosylyp otyrǵan jabdyqtar qazirgi zamanǵa saı jáne joǵary dáldiktegi tehnıka ǵana emes, bul baǵa jetpes adam ómirin, azamattarymyzdyń densaýlyǵyn saqtaýǵa jasalǵan salaýatty is. Olardyń dál dıagnoz qoıýǵa, emdeýdi josparlaýǵa, sáýlelik terapııanyń saldaryn azaıtýǵa múmkindik beretini dáleldengen. Ortalyqtyń joǵary bilikti personalynyń arqasynda bul jabdyq ıgi iske qyzmet etetin bolady. Osy apparattardy paıdalaný arqyly ortaq kúsh-jigerimizdi jumsaı otyra azamattarymyzdyń ıgiligi úshin qyzmet etemiz, deıdi «Iаdrolyq medısına jáne onkologııa ortalyǵynyń» bas dárigeri Saıat Tańatarov.
Atalǵan qaıyrymdylyq joba aıasynda aldaǵy ýaqytta ózge de óńirlerdi joǵary tehnologııalyq qondyrǵylarmen, qazirgi zamanǵy onkologııalyq jabdyqtarmen qamtamasyz etý kózdelip otyr. Keleshekte Astana, Almaty, Qaraǵandy, Petropavl qalalaryndaǵy medısına ortalyqtarynda iske qosylatyn bul sáýlelik terapııa apparattary densaýlyq salasyn jaqsartýǵa mol múmkindik beretini anyq.