Reseıdiń Sýzdal qalasynda grek-rım kúresinen general-leıtenant Roman Kýtýzovtyń memorıaly aıaqtaldy. Jarysta elimizdiń birneshe balýany baq synaǵanymen, ekeýi ǵana jeńis tuǵyryna kóterildi.
Azııa chempıonatynyń tolyq júlde jıyntyǵynyń ıegeri, Azııa oıyndarynyń qola júldegeri Álimhan Syzdyqov Sýzdalda ózin jaqsy qyrynan kórsetti. Alyptarmen aıqasyp júrgen nar tulǵaly jigit bastapqy básekelerinde jeńiske jetip, jartylaı fınalda armenııalyq Albert Vardanıandy jyqty. Fınaldyq básekede Bısolt Dısıev jattyqtyratyn balýannyń joly byltyr Reseı chempıony, bashqurtstandyq Nohcho Labazanovpen qıysty. Sheshýshi saıysta qarsylasyna adym ashtyrmaı, óte saýatty kúresken Álimhan altyn medaldy moınynda jarqyratty.
55 kg salmaqtaǵy Marlan Muqashev qola medal ıelendi. Úshinshi oryn úshin saıysta ol krasnodarlyq Artem Sagalakovty 9:1 esebimen oısyrata utty. Dál sol tuǵyrdan kórinýge taǵy eki jerlesimizdiń múmkindigi boldy. Meıirjan Shermahanbet (67 kg) alǵashqy aınalymdardyń birinde komandalas áriptesi Dinmuhamed Qoshqardy jolynan yǵystyrdy. Biraq sheshýshi tusta bilgeninen jańyldy. Áýeli Iаmalo-Neneskiniń ókili Azamat Ahmedovten utylyp, odan keıin altaılyq Maksım Novıchıhınniń aldynda dármensizdik tanytty. Nátıjesinde besinshi oryndy qanaǵat tutty. Dál sol mejede Bekjan Qabdol Máskeý oblysynyń ókili Anvar Allahıarovtan aılasyn asyra almady.
77 kg salmaqta Ádilet Tóleýbaev qola medaldy qanjyǵasyna baılady. Reseıde týyp-ósken qandasymyz Máskeý oblysynyń atynan synǵa tústi. Jartylaı fınalda Ismaıl Marahovtan (Máskeý qalasy) utylǵan ol úshinshi oryn úshin tartysta Dmıtrıı Adamovtan (Vladımır oblysy) basym tústi.
Kýtýzov memorıalynyń jeńimpazdary: 55 kg – Ihtııor Botırov (О́zbekstan), 60 kg – Iаnvar Allahıarov (Máskeý oblysy), 63 kg – Sergeı Emelın (Mordovııa), 67 kg – Rýslan Bıchýrın (Mordovııa), 72 kg – Alen Mırzoıan (Sverdlov oblysy), 77 kg – Imran Álıev (Krasnodar ólkesi), 82 kg – Islam Álıev (Krasnodar ólkesi), 87 kg – Abýıazıd Mansıgov (Vladımır oblysy), 97 kg – Adlan Amrıev (Bashkurtstan), 130 kg – Álimhan Syzdyqov (Qazaqstan).