Ál-Farabı atyndaǵy Qazaq ulttyq ýnıversıteti Fılosofııa jáne saıasattaný fakýltetinde dintaný mamandyǵy 1-kýrs stýdentteriniń qatysýymen «Sen halqyńnyń júregindesiń, jaýynger!» taqyrybynda kezdesý ótti.
Is-shara aýǵan jerinen keńes áskerleriniń shyqqan kúnine oraı uıymdastyryldy. Aýǵan soǵysy ardagerlerine qurmet kórsetý, jat jerde kóz jumǵan azamattarymyzdy eske alý men jastarǵa patrıottyq tárbıe berýdi maqsat etken kezdesýge jalyndaǵan jastyq shaǵyn oq pen ot arasynda ótkizip, elge aman-saý oralyp, týǵan jerimen qaýyshqan ınternasıonalıst-jaýyngerler qatysty. Olardyń qatarynda «Abyroı» Aýǵan soǵysy ardagerleri odaǵynyń tóraǵasy Álı Daýylbek pen ózge de jaýynger-ardagerler arnaıy keldi. Dintaný jáne mádenıettaný kafedrasynyń professory Qarlyǵash Borbasova jıynda stýdentter úshin aýǵan soǵysy ardagerleriniń estelik áńgimelerin tyńdaýdyń mańyzyn atap ótti.
Aýǵan soǵysynyń ardager jaýyngerleri stýdentterge týǵan elin súıý, qurmetteýge qatysty taǵlymdy áńgimeler aıtyp, soǵys dalasynda ótken jyldardy eske alyp, estelikterimen bólisti.
«Biz barlyǵymyz óz otanymyzdyń patrıoty bolýymyz kerek. О́kinishke oraı, sońǵy jyldary otan aldyndaǵy áskerı mindetin atqarýdan qashqaqtaý sebepteri jıilep ketti. Ata-babalarymyz naızanyń ushymen qorǵap, amanat etip qaldyrǵan ulanǵaıyr jerdiń bolashaq ıesi – jastar. Otan aldyndaǵy boryshty óteý árbir azamatty batyrlyqqa, ójettikke baýlyp qana qoımaı, ásker mindettiń, bolashaqta áskerı ǵylymdy damytý isine qatysýǵa yqpal etedi. Búginde tehnologııa qaryshtap damyǵan kezeńde elimizdiń qoǵanys salasynda zamanaýı tehnıka, tehnologııalardy ıgergen jastardyń kóbeıgeni abzal» dep atap ótti Álı Daýylbek.
Kezdesý barysynda stýdentter aýǵan soǵysynan aman qaıtqan, qaıtpas ta qaısar jaýynger-ardagerlerge qurmet kórsetip, pikir almasty.