«Áleýmettik ámııan»: Áleýetti arttyrýdyń artyqshylyǵy

Prezıdent memleket tarapynan qoldaý kórsetilgen kezde azamattardyń naqty tabysy eskerilmeı jatqanyn, áleýmettik qol­daýǵa múlde muq­tajdyǵy joq ál-aýqa­ty joǵary otbasylar da memleketten kómek alyp otyrǵanyn atap aıtty. Halyqqa memleket tarapynan beriletin qoldaýdy áli de jetildirý qajettigin, áleýmettik kómek ádil, ashyq ári tıimdi bolýy kerektigin eskertti.

Bıyldan bastap «Áleýmettik ámııan» tolyqtaı engiziledi. Bul shara­ny Sıfr­lyq damý, ınnovasııalar jáne aero­ǵarysh ónerkásibi, Eńbek jáne halyq­ty áleýmettik qorǵaý, Densaýlyq saqtaý, Oqý-aǵartý mınıstrlikteri barlyq óńir­diń ákimdikterimen birlese atqarady. Premer-mınıstr O.Bektenov Úkimet oty­rysynda 1 jeltoqsanǵa deıin jobaǵa kire­tin memlekettik qyzmetter tizilimi berilýge tıis ekenin atap ótti.

«Áleýmettik ámııan» jobasynda ár otbasynyń áleýmettik mártebesine qaraı memlekettik qoldaý túrleri bar. Qanatqaqty rejimde memlekettik qoldaýdyń eki sharasy iske qosyldy. Aldymen oqýshylardy ystyq tamaqpen qamtamasyz etý. Balanyń tamaqtanýy týraly aqparat negizinde aza­mattyń áleýmettik ámııanyna  vaýcher túsedi. Oqýshynyń mektepte tamaqtanǵany júıede esepke alynady ári bul týraly ata-anasy da «Áleýmettik ámııan» arqyly habardar bolady. Sondaı-aq ata-ana memlekettik qoldaý sharasynyń sapasy týraly keri baılanys ornata alady.  Osy aqparat negizinde qyzmet kórsetý aktisi men tólem shoty jasalady. Memleket vaýcherdi qarjylandyrýdy tamaqtaný faktisi boıynsha júzege asyrady. Burynǵydaı bastaýysh synyp oqýshylarynyń sanyna negizdelmeıdi. Muny Oqý-aǵartý mınıstrligi Sıfrlyq damý, ınnovasııalar jáne aeroǵarysh ónerkásibi mınıstrligimen yntymaqtasa, «eGov Mobile» mobıldi qosymshasynda «Áleýmettik ámııan» aıasynda engizip otyr.

Sıfrlyq damý, ınnovasııalar jáne aeroǵarysh ónerkásibi mınıstrliginiń málimetinshe, elimizdegi 2000-nan astam mektepte bilim alyp jatqan 703 myńnan astam oqýshy «Áleýmettik ámııan» arqyly tegin ystyq tamaqpen qamtylǵan. «Áleýmettik ámııan» aıasyn keńeıtý maqsatynda ınte­g­rasııalaý jumysy júrgizilip jatyr. Aldy­men Aqmola, Mańǵystaý oblystary­nyń, ­Astana, Shymkent qalalarynyń mek­tepterine ­s­ynaq retinde engizildi. Aldaǵy ýaqytta ­ózge óńirler de qamtylady.

«Áleýmettik ámııanmen» «eGov Mobile» qosymshasyna tirkelip, «Dári-dármekpen qamtamasyz etý» bólimi arqyly tapsyrys berýge bolady. Servıs qyzmetiniń tilin túsinbeıtin qart kisiler emhanaǵa baryp Face-ID men veb-kameralar ar­qy­ly sáıkestendirýden ótý arqyly qa­jetti dárisin alady. Densaýlyq saqtaý mınıstr­ligi «Áleýmettik ámııan» arqyly dári-dármekterdi berý qanatqaqty jobasy 700-den astam medısınalyq uıymda júzege asyrylatynyn málimdedi. Osy ýaqytqa deıin 93 myń reseptpen dáriler berilgen. Endi naýqas ózine qajet dárini izdegende  burynǵydaı resept alý úshin aldyn ala dárigerdiń qabyldaýyna jazylyp, kezekke turyp, ýaqytyn shyǵyndamaıdy. Munda tólenetin qarajat dári-dármekterdi naqty bergennen keıin óteledi. Memlekettik organdar «Áleýmettik ámııan» platformasy arqyly ózderiniń qoldaý sharalaryn kezeń-kezeńimen dál osylaı júzege asyrady.

Memlekettik qyzmetterdi sıfrlan­dyrýdyń ıgiligin el kórýge tıis. Qoldaý sharalarynan habarsyz azamattar da joq emes. Munyń barlyǵy da durys qulaqtandyrmaýdyń saldary. «Áleýmettik ámııan» – memlekettik qoldaý sharalarynyń barlyq túrlerin habarlaýdyń, usynýdyń, esepke alýdyń biryńǵaı platformasy. Jobaǵa kezeń-kezeńimen memlekettik qoldaý sharalary kóshiriledi. Ár azamat ózine tıesili memlekettik qoldaý túrleri týraly habarlamany platformadan taba alady.

Joba sıfrlyq tehnologııalardy engizý esebinen áleýmettik kómek quraldaryn maqsatsyz paıdalanýdy barynsha azaıtýǵa baǵyttalǵan. Osylaısha, azamat memlekettik qoldaýdyń barlyq túrlerin ǵana emes, sonymen birge Memleket shyǵyndarynyń mólsherin de kóredi. Memleketke de tıimdi: qarajattyń maqsatty paıdalanylýyn tizimdep qana qoımaı, tikeleı baqylaý júrgizip, saralap otyrady. «Áleýmettik ámııan» «eGov mobile» qosymshasynyń ishinde jeke qyzmet retinde iske qosyldy.

Kópshiliktiń kókeıinde «Áleýmettik ámııan» jobasy arqyly áleýmettik tólemder jasaýǵa bola ma, buǵan túsken aqshany qolma qol sheship alýǵa nemese bank shotyna aýdarý múmkin be degen saýaldardyń týyndaıtyny anyq. Bastapqy kezeńde joba arqyly aqshalaı emes, naqty memlekettik qoldaý sharalary kórsetiledi.

Ulttyq bank Qarjy mınıstrligimen birlese otyryp, sıfrlyq teńge platformasyn júzege asyrýdy qolǵa aldy. Munyń tıimdiligi – «Áleýmettik ámııan» jobasy sheńberinde sıfrlyq vaýcherlermen esep aıyrysý múmkindigi paıda bolady. Bul ­bas­tama áleýmettik tólemderdi avtomat­tandyryp, esepke alý úderisterin jedeldetedi, áleýmettik kómektiń aıqyn­dy­lyǵyn arttyrady. Sonymen qatar úshinshi tulǵalar tarapynan óndirip alý men tyıym salýdyń saqtalýyna kepildik beredi.

«Áleýmettik ámııan» jobasy «eGov Mobile» mobıldi qosymshasy arqyly júzege asyrylady. Azamattardyń jeke derek­teri qanshalyqty qorǵalady degen saýal­dy Sıfrlyq damý, ınnovasııalar jáne aeroǵarysh ónerkásibi mınıstrligine jol­daǵan edik. «Qazirgi ýaqytta «Áleýmettik ámııan» «Elektrondyq úkimettiń» «eGov mobile» mobıldi qosymshasy aıasynda jeke qyzmet retinde iske qosyldy. Osylaısha, azamattardan «Áleýmettik ámııan» jobasyna jeke avtorızasııa talap etilmeıdi. Derbes derekterdi qorǵaý, saqtaý hám óńdeý qamtamasyz etiledi», dep málimdedi mınıstrlikten.

Azamattar «Áleýmettik ámııandy» bank kartalarymen qatar qoldana, paıdalana alady. Eger bank aldynda boryshy bolsa, kollektorlar, salyq organdary ámııandaǵy qarajatty buǵattap, óndire almaıdy. О́ıtkeni buǵan eseptelip aýdarylǵan qarajat «Tólemder jáne tólem júıeleri týraly» zańǵa sáıkes qorǵalady.