El úshin etken eńbek eshqashan umytylmaıdy. Kózi tirisinde-aq «qoly jeńil dáriger» atanǵan Tileýles Batyrhanov aǵamyz óz isin jete bilgen, elge qaltqysyz qyzmet etken azamat edi. Ońtaılandyrý kezinde keıbir ataǵy shyqqan áriptesteri jeke emhana ashýǵa talpynyp, uzyn aqshanyń shylbyrynda ketkende «bárimiz paıda qýa bersek, myna jurtty kim emdeıdi» dep kúıinedi eken.
Jaqynda otbasyna aqjoltaı habar kelgen. Astanada dárigerlerdiń kásibı merekesi qarsańynda Qazaqstannyń medısınalyq assosıasııasy qurylǵanyna 25 jyl tolýyna oraılastyrylyp, «Eýrazııalyq densaýlyq kópiri-2015» atty halyqaralyq forým ótti. Atalǵan saltanatta úzdikter marapattaldy. Ulttyq medısınalyq assosıasııasynyń eń joǵarǵy marapaty «AVE VITAE» ordenin osy jıynda ońtústik óńirinen kezindegi eleýli eńbegi eskerilip, Tileýles Tilenulyna berýge sheshim qabyldandy. Jıynda orden Tileýles aǵanyń uly Asqarǵa tabystaldy.
Oqyrmandarǵa túsiniktirek bolý úshin dáriger jóninde az-kem aıtqan oryndy shyǵar. Shámshi ánimen baıtaq Qazaqstanǵa tanys Arys aýdany Aqbulaq eldi mekeninde dúnıege kelgen Tileýles Tilenuly Batyrhanov 1972 jyly Almaty memlekettik medısına ınstıtýtynyń emdeý isi fakýltetin úzdik bitirgennen keıin ómiriniń sońyna deıin Ońtústik óńiriniń densaýlyq saqtaý salasynda ónimdi qyzmet jasaǵan.
«QR densaýlyq saqtaý isiniń úzdigi», «Altyn dáriger» tósbelgisiniń ıegeri, medısına ǵylymdarynyń kandıdaty, joǵary sanatty hırýrg-travmatolog, joǵary sanatty áleýmettik gıgıena jáne densaýlyq saqtaýdy uıymdastyrý dárigeri. 1973-2006 jyldary oblysymyzdyń, qalamyzdyń birqatar densaýlyq saqtaý salalarynda, sonyń ishinde Shymkent qalalyq medısınalyq jedel járdem aýrýhanasy bas dárigeriniń orynbasary, keıin bas dárigeri qyzmetinde, oblystyq klınıkalyq balalar aýrýhanasy bas dárigeriniń orynbasary laýazymynda qyzmet atqarǵan.
Altyn qoldy dáriger 2006 jyly dúnıeden ótse de eseli eńbegi umytylǵan joq. Bir kezderi ol kisi qyzmet etken oblystyq klınıkalyq balalar aýrýhanasynyń qabyrǵasyna memorıaldyq taqta ilindi.
Baqtııar TAIJAN,
«Egemen Qazaqstan».
ShYMKENT.