2025 jylǵy 1 qańtardan bastap Qazaqstanda medısınalyq uıymdar medısınalyq-áleýmettik saraptamaǵa syrttaı proaktıvti formatta jiberetin azamattardy kýálandyrý jónindegi táýelsiz sarapshylar ınstıtýty engizildi, dep habarlaıdy Egemen.kz.
Eńbek jáne halyqty áleýmettik qorǵaý mınıstrliginiń habarlaýynsha, táýelsiz sarapshylar ınstıtýtyn engizý densaýlyq saqtaý uıymdarynyń beıindi mamandaryn medısınalyq-áleýmettik saraptamaǵa tartýǵa múmkindik beredi. Sondaı-aq MÁS qyzmetin kadrlarmen qamtamasyz etý máselelerin sheshýge yqpal etedi, sybaılas jemqorlyq quqyq buzýshylyq táýekelderin azaıtady jáne múgedektikti belgileý boıynsha memlekettik qyzmet kórsetý sapasyn arttyrady.
«Osy ınstıtýtty tıimdi engizý maqsatynda 2024 jylǵy qyrkúıekten jeltoqsanǵa deıin pılottyq rejımde medısınalyq-áleýmettik saraptamaǵa táýelsiz sarapshylardy tartý tetigi synaldy. Pılottyq jobaǵa 18 dáriger qatysyp, MÁS-tiń 7 532 aktisi qaraldy. Pılottyq jobanyń nátıjeleri boıynsha qoldanystaǵy normatıvtik quqyqtyq aktilerge ózgerister men tolyqtyrýlar engizildi», delingen habarlamada.
Qazirgi tańda QR Eńbek jáne halyqty áleýmettik qorǵaý mınıstrliginiń Áleýmettik qorǵaý salasyndaǵy retteý jáne baqylaý komıteti medısınalyq-áleýmettik saraptamanyń táýelsiz sarapshylarynyń tizilimine engizý úshin úmitkerlerdiń qujattaryn qabyldap jatyr. О́tinishter Áleýmettik qyzmetter portaly (aleumet.egov.kz) arqyly beriledi, bul rette úmitkerler derbes derekterdi jınaýǵa jáne óńdeýge kelisim beredi.
Buǵan deıin habarlaǵandaı, búginde syrttaı kýálandyrý 30 nozologııalyq nysan boıynsha júrgiziledi. 2025 jyldyń basynan beri osy formatta Qazaqstannyń barlyq óńirlerinen MÁS-ke túsken 8,5 myńnan astam ótinim qaralǵan.