Memleket basshysy Qasym-Jomart Toqaev byltyrǵy «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýynda kásiptik bilim berý órisine reforma júrgizý keregin tapsyrdy. Bıyl «Jumysshy mamandyqtary jyly» dep jarııalandy. Jumysshy mamandardyń qajyr-qaıratyn dáriptep, úlgi etý tek bir jylmen ǵana shektelip qalmaýy kerek.
Jastar jumysshy mamandyǵyna qanshalyqty qyzyǵady degen saýaldy bilikti maman, ınjener-qurylysshy Erlan Mustafaevqa qoıǵan edik. «Eń birinshi olardyń boıynda mamandyqqa degen qurmeti joǵary bolýǵa tıis» deıdi maman. Árqashanda oqý, bilim alý adamǵa kesh emes ekenin de atap ótti. О́zi mektepti bitirgen soń bir jyl qazirgi Jetisý oblysy Kerbulaq aýdanyna qaraıtyn Basshı aýylynda eńbekke aralasyp, áskerı mindetin oryndaýǵa barǵanyn jetkizdi. Keıin О́skemendegi qurylys ınstıtýtyn támamdap, ınjener-qurylysshy mamandyǵyn meńgeredi.
«Men úıdegi jeti balanyń tuńǵyshy edim. Ákem 34 jasynda kópir qurylysy kezinde mertigip, uzaq ýaqyt emdeldi. Ákem ekinshi toptaǵy múgedek edi. Sosyn úıdiń bar sharýasy maǵan qarady. О́zime tete qaryndasym oqýǵa túsip, bir jyl qalaǵa jersingenshe aýylda ákem men anamnyń janynda baýyrlaryma bas-kóz boldym», deıdi E.Mustafaev. О́skemendegi oqýyn támamdaǵan soń jas mamandy Almaty oblystyq kommýnaldyq sharýashylyǵyna jiberedi. Maman bul orta úlken ustahana bolǵanyn aıtady. Oblystyń qurylys-montaj basqarmasynda qatardaǵy qyzmetkerden basshy laýazymyna deıin qyzmet satysyna ósti.
«Qurylys salasyn jete biletin maman retinde aıtarym, búginde dánekerleýshi mamandar óte qat. Dáneker degen – bolatty bir-birine jalǵaý ǵana emes, temirden túıin túıip, órnek salýmen birdeı. Temirdi temirge jalǵaýdy elektrodty eritip quıý dep qana túısiný – qate. Asqan sheberlikti talap etetin mamandyq. Odan keıin elektrık mamandar da tapshy. Baıqaǵanym, jas mamandardyń talabymdy ushtasam, sheberligimdi shyńdasam degenge umtylysy tómen. Qurylys salasyndaǵy mamandyq ıeleri de shyǵarmashylyq adamdar sekildi únemi izdeniste bolyp, ósýge talpynýy kerek. Keıingi tolqynnyń jaýapkershiligi joǵary bolsa eken deımin. Memleket basshysynyń bıyl Jumysshy mamandyqtary jyly dep jarııalaýyn qoldaımyn. Jyldyń tórt mezgilinde de qurylystyń basynda júretin jandardyń eńbegi qashanda elenýge tıis», deıdi maman.
Erlan Halıluly temirjol qurylysynda da qoltańbasyn qaldyrdy. Teplovoz ben vagondardy jóndeýden ótkizetin arnaıy orynnyń qurylysyn júrgizý júktelgende senimdi aqtaı bildi. Bilikti mamannyń basqarýymen temirjol depolary da boı kóterdi. Kókshetaýǵa barar kúre joldaǵy aınalmaly kópirdi de Erlan Mustafaev jetekshilik etken qurylys kompanııasy saldy. Shýche – Zerendi baǵytyndaǵy kópirdi de bizdiń keıipkerimiz bastaǵan bilgir mamandar turǵyzdy. Onyń eńbegi eskerýsiz qalmaı, jaqynda «Eńbek ardageri» tósbelgisimen marapattaldy.
«О́leńge árkimniń-aq bar talasy» dep hakim Abaı jyrlaǵandaı, Erlan Halıluly da sóz ónerinen qarajaıaý emes, eptep óleń de jazady. Qoly qalt etse, aǵashtan túrli buıymdar da jasaıdy. Aınalasyn dospen qalaǵan jannyń azamattyǵy, jomarttyǵy jaıynda joldastary tolǵana aıtady.
«Eńbektiń nany tátti» deımiz, eshkimniń ala jibin attamaı, jan balasyna qııanat jasamaı tapqan tabysyńnyń berekesi mol. О́zińe senip tapsyrylǵan qyzmetti adal, jaýapkershilikpen atqarǵan durys. Sonda ǵana eldiń alǵysyna bólenesiń, mártebeń ósedi. Adal júrip, abyroıǵa kenelgenge ne jetsin» deıdi E.Mustafaev.
Memleket basshysynyń «Adal azamat – Adal eńbek – Adal tabys» qaǵıdatyna tolyq saı keletin tulǵalardyń ónegeli ómir joly nasıhattalyp, baǵalanýǵa tıis. Osy oraıda, 40 jylǵa jýyq qurylys salasynda eńbek etip kele jatqan mamannan ómirden ne túıgenin suradyq.
«Jastarǵa aıtar aqylym, jaýapkershilik degen uǵym únemi joǵary bolsa eken deımin. Ásirese qurylys salasynda osy obal men saýapty oılamaýdyń aqyry opyq jegizedi. Sapasy syn kótermeıtin qurylystyń júrgizilýi jaýapkershilikti sezinbeýdiń, amanatqa qııanat jasaýdyń saldarynan dep paıymdaımyn», deıdi kásibı maman. Osy jaýapkershilikti sezine alyp júrmiz be?