Qaraǵandy oblysynyń Shet aýdanynda jergilikti aýqymdaǵy tótenshe jaǵdaı engizildi. Basty sebep – energııamen jabdyqtaý jaǵynan másele týyndady, dep habarlaıdy Egemen.kz.
Qazir 27 eldi mekenge elektr qýatyn berýge shekteý qoıyldy. Energııamen qamtamasyz etýge jaýapty «Shet-Energo» kompanııasy «Jezqazǵan elektr taratý jelisi» AQ-nyń talabyn oryndamaǵan. Jergilikti bıliktiń málimentinshe, «Shet-Energo» biraz jyldan beri jelilerdi jańǵyrtpaǵan. Saldarynan aqaý shyǵyp, úıler men áleýmettik nysandar jıi jaryq pen jylýsyz qalyp otyr. Eskertýge qaramastan kompanııa qyzmet sapasyn jaqsartýǵa tyryspaǵan. Qazir tozǵan elektr jelilerin shuǵyl qalypqa keltirý úshin aýdan aýmaǵyndaǵy kásiporyndar jumyldyryldy.
Shet aýdanynyń ákimi Muhıt Muhtarovtyń aıtýynsha qos kásiporynnyń arasynda kelisimsharttyń bolmaýy jáne elektr jelilerine jaýapty mekemeniń aýqymdy jóndeý jumystaryn jasamaýy, aýdan aýmaǵyndaǵy 3 myńǵa jýyq turǵyn úı men 43 áleýmettik nysandardy jaryqsyz qaldyryp qana qoımaı, ózge de oryn alýy yqtımal qaýipterdi týdyryp otyr.
«Sondyqtan oblys ákiminiń tapsyrmasyna sáıkes, jergilikti atqarýshy organ retinde apattyń aldyn alý, keleńsizdikterdi joıý maqsatynda aýdan aýmaǵynda TJ jarııalandy. Bul kásiporyn aldaǵy ýaqytta turǵyndarǵa sapaly qyzmet kórsete almaýyna baılanysty zańdylyqtar sheńberinde rekvızısııa jasaý máselesi qarastyrylatyn bolady», deıdi aýdan ákimi.