Turǵyn úı qurylysy qarqyn alýda

Aqtóbe qalasy jyl ótken saıyn kórkeıip, kó­riktenip keledi. Qala qanatyn keńge jaıyp, jańa shaǵyn aýdandar boı kóterýde. Shahardyń shaǵyn aýdandaryna úsh-tórt aı atbasyn tiremeseń iri qurylystar aldyńnan shyǵa keledi desek artyq aıtqandyq bolmas. Buǵan memlekettik qoldaýlar da serpin berýde. Ústimizdegi jyly «Nur Aqtóbe» shaǵyn aýdanynda, «Zarechnyı-3», Kirpishti, Qarǵaly eldi mekenderinde «Nurly Jol» memlekettik baǵdarlamasy aıasynda tur­ǵyn úıler men bilim berý nysandarynyń qurylysyn salý kózdelýde. Bul maqsatqa Ulttyq qordan 3 979,3 mıllıon teńge bólingen. – Ulttyq qordan bólingen 1 150 mıllıon teńgege 3 jańa bilim berý nysany salynady. «Zarechnyı-3» eldi mekeninde 600 oryndyq já­ne Kirpishti aýylynda 320 oryndyq mekteptiń, sondaı-aq, Qarǵaly eldi mekeninde 320 oryndyq balabaqshanyń qurylysy bastalady. Qazirgi tańda «Zarechnyı-3», Kirpishti, Qarǵaly eldi mekenderinde salynatyn jańa bilim berý nysandarynyń qurylysyna qatysty qujattar daıyndalyp, qurylys-qurastyrý jumystaryna daıyndyq jasalýda. Al «Nur Aqtóbe» shaǵyn aýdanyndaǵy 1200 oryndyq orta mektep pen 320 oryndyq balabaqshanyń qurylysy jalǵasýda. Jyl aıaǵyna deıin eki nysan da paıdalanýǵa beriledi, – deıdi Aqtóbe qalasy ákiminiń keńesshisi Gennadıı Dýdakov. Sondaı-aq, atalǵan baǵdar­lama aıasynda Ulttyq qordan bólinetin 2 500,0 mıllıon teńgege «Nur Aqtóbe» shaǵyn aýdanynda 3 nesıelik turǵyn úıdiń qurylysy bastalady dep kútilýde. Bul úılerdiń qurylysyn merdiger uıym – «Aqtóbe-Sáýlet» JShS júrgizedi. Seriktestik dırektory Arnur Aqmádı «Nur Aqtóbe» shaǵyn aýdanyndaǵy №20 úıdiń qurylys jumystary jyl sońyna deıin aıaqtalatynyn aıtady. Qazirdiń ózinde bul úıdiń ishki jumystarynyń 60 paıyzy atqarylǵan kórinedi. Jylý júıesi, gaz, sý qubyrlary ornatylyp, edenderin tóseý jumystary jasalynyp jatyr. Qurylysqa negizinen jergilikti materıaldar ǵana qoldanylýda. Munda 560 adam jumys isteıdi. Sondaı-aq «Nur Aqtóbe» shaǵyn aýda­nynda nesıelik baǵyt boıynsha 3 kópqabatty tur­ǵyn úı salý qaralǵan. Bul úıler «Turǵynúıqu­ry­lysjınaqbanki» aksıonerlik qoǵamy arqyly paıdalanýǵa berilgen kezde 540 otbasy baspanaly bolmaq. Sondaı-aq, osy shaǵyn aýdanda Ulttyq qordan bólinetin 2500,0 mıllıon teńgege salynatyn 3 nesıelik turǵyn úı «Qoljetimdi turǵyn úı-2020» baǵdarlamasy aıasynda 234 jas otbasyǵa jáne 207 jergilikti atqarý organdarynyń kezekte turǵan azamattaryna jalǵa beriledi. Iаǵnı bıyl jáne keler jyly 981 aqtóbelik baspanaly bolady dep kútilýde. Al jeke turǵyn úı salý da jalǵasyn tabýda. Bir sózben aıtqanda, óńirde turǵyn úı qurylysy qyza túsken deýge ábden bolady. Satybaldy SÁÝIRBAI, «Egemen Qazaqstan». Aqtóbe oblysy.