Jambyl oblysynyń ákimi Erbol Qarashókeev bastaǵan top Túrkııanyń Mersın provınsııasyna jumys sapary barysynda Qazaqstan-Túrkııa ınvestısııalyq forýmyna qatysyp, túrkııalyq iri kompanııalarmen V2G formatynda kezdesýler ótkizdi, dep habarlaıdy Egemen.kz tilshisi oblys ákimdiginiń baspasóz qyzmetine silteme jasap.
Mańyzdy basqosý barysynda bıznes ókilderimen iskerlik baılanys ornatý, ınvestısııa tartýdaǵy múmkindikterdi jan-jaqty zerdeleý máseleleri sóz boldy. Jambyl oblysynyń ákimi E. Qarashókeev mundaı kezdesýler túrik kompanııalary tarapynan Jambyl oblysynda óndiris aýqymyn keńeıtýge degen qyzyǵýshylyqty arttyratynyn atap ótti.
Sondaı-aq E Qarashókeev Jambyl oblysynyń joǵary ınvestısııalyq áleýeti men artyqshylyqtaryna toqtalyp, el Prezıdenti Qasym-Jomart Toqaevtyń tapsyrmalaryn júzege asyrý aıasynda mańyzdy ınvestısııalyq jobalardy qoldaý sharalary týraly baıandady. Sondaı-aq, óńirdiń qolaıly klımattyq jaǵdaıyn, logıstıkalyq turǵydan tıimdi geografııalyq ornalasýyn, tabıǵı resýrstardyń, onyń ishinde metallýrgııa, hımııa jáne qurylys salalaryn damytý úshin qor jetkilikti ekenin jetkizdi.
Sońǵy ýaqytta óńirde qolaıly ınvestısııalyq saıasat júzege asýda desek, úsh jylǵa josparlanǵan 7 mlrd dollardy quraıtyn iri jobalar oǵan dálel bola alady. Erbol Qarashókeev túrik kompanııalaryn oblysqa ınvestısııa quıýǵa shaqyryp, aýyl sharýashylyǵy ónimderin óńdeý, týrızm, qurylys, taý-ken ónerkásibi, kabeldik ónimderdiń, jeldetý jáne elektr jabdyqtarynyń, sorǵylardyń, sondaı-aq oqshaýlaǵysh materıaldardyń óndirisin qurý baǵyttaryndaǵy orasan zor áleýetke nazar aýdartty.
– Biz múddeli ınvestorlardy qoldaýǵa, keń aýqymdy preferensııalar berýge, daıyn ınfraqurylymy bar óndiristik úı-jaılarmen qamtamasyz etýge daıynbyz. Aýmaǵy 40 myń sharshy metrdi quraıtyn úı-jaılardyń qurylysy aıaqtalýǵa jaqyn. Bıyl taǵy 100 myń sharshy metr qurylys josparlanǵan. Investısııalyq jobalardy súıemeldeýmen aınalysatyn «Zhambyl Invest» dıreksııasynda Túrkııamen jumys isteý úshin jeke bólim qurylǵan, — dedi oblys ákimi.
Forým barysynda taraptar qosymsha salalardyń damýyna áser etip, ekonomıkanyń básekege qabilettiligin arttyrǵan Mersın provınsııasy aýmaǵyndaǵy atom elektr stansııasyn salý jobasyn talqylady. Jambyldyq delegasııa músheleri túrik seriktesteriniń ozyq tájirıbesin qarastyrýǵa qyzyǵýshylyq bildirdi.
Mersın Saýda-ónerkásip palatasy tóraǵasynyń orynbasary Mustafa Ozdamar provınsııanyń ınvestısııa tartý boıynsha kóshbasshy ekenin atap ótip, Qazaqstanmen, onyń ishinde Jambyl oblysymen yntymaqtastyqty nyǵaıtýdyń zor múmkinshiligine toqtaldy.
Mersın provınsııasy gýbernatorynyń orynbasary Irfan Demıroz Qazaqstan men Túrkııa uzaq jyldar boıy tyǵyz yntymaqtastyqty saqtap kele jatqanyn, ortaq tarıhı jáne mádenı baılanystar ekijaqty qarym-qatynastardyń negizi ekenin jetkizdi. Ol Jambyl oblysymen ózara is-qımyldy keńeıtýge nıet bildirdi. Sondaı-aq Túrkııadaǵy KAZAKHINVEST ókili Ersultan Jańabaev oramdy oılaryn ortaǵa saldy.
Jambyl oblysynyń delegasııasy Mersın kásipkerlerimen de B2G formatynda kezdesýler ótkizdi. Bul tikeleı baılanys arnalaryn qurýǵa, Jambyl oblysy men Mersın provınsııasy aýdandarynyń saýda belsendiligin yntalandyrýǵa yqpal etpek.
Mersındik isker top ókilderi Jambyl oblysymen birlesip sement, dızel maıy, kún batareıalaryn óndirý, jemis-jıdek, kókónisterdi óńdeý jáne basqa da baǵyttar boıynsha jobalardy júzege asyrýǵa daıyn ekendikterin rastady. Kezdesýler barysynda árbir joba egjeı-tegjeıli talqylanyp, óńir basshysy kásipkerlerdiń barlyq suraqtaryna tolyq jaýap berdi.
Jambyl oblysy