Memleket basshysy Qasym-Jomart Toqaevqa elimizdiń áleýmettik-ekonomıkalyq damýy jáne Úkimet qyzmetiniń tıimdiligin arttyrý jóninde baıandaldy, dep habarlaıdy Egemen.kz Aqordanyń baspasóz qyzmetine silteme jasap.
Prezıdentke ekonomıkany ártaraptandyrý men naqty sektordaǵy aýqymdy baǵdarlamalardy qoldaý arqyly yntalandyrýǵa jáne ınfraqurylymdy jańǵyrtýǵa qatysty buǵan deıin bergen tapsyrmalarynyń oryndalý barysy tanystyryldy. Sondaı-aq Premer-Mınıstr jylytý maýsymyn ótkerý, kóktemgi egis jumystaryna jáne sý tasqynyna qarsy daıyndyq sharalary týraly aıtty.
Budan bólek, Qasym-Jomart Toqaevqa bıznesti damytý jáne jeke ınvestısııa tartý úshin basqarýdyń zamanaýı sıfrlyq tásilderin engizý baǵytyndaǵy Úkimet jumysy jóninde aqparat berildi.
Kezdesý sońynda Prezıdent Premer-Mınıstrge ekonomıkanyń qarqyndy ósimin jáne ártaraptandyrýdy qamtamasyz etý jumystaryn jandandyrýdy tapsyrdy. Infraqurylymdy jetildirýge, energetıka men kommýnaldyq sharýashylyqty jańǵyrtýǵa qatysty mindetterdi iske asyrý maqsatynda júıeli sharalar qabyldaýdyń mańyzyn atap ótti.