«Biz Birgemiz Qazaqstan 2030» qorynyń basshysy Perızat Qaırattyń qarjy jymqyrý isi boıynsha «Asar Úme» qory resmı túrde jábirlenýshi tarap dep tanyldy, dep habarlaıdy Egemen.kz.
«Biz sengimiz kelmeıtin faktiler shyndyqqa aınalyp, bul jaǵdaı eldegi qaıyrymdylyq salasyna úlken soqqy boldy. Bul oqıǵa ıgi istermen aınalysatyn ár adamǵa áserin tıgizip, qaıyrymdylyqqa degen senimge kúmán uıalatty. О́kinishke qaraı, OO «Biz Birgemiz Qazaqstan 2030» jasaǵan alaıaqtyq áreketter bizdiń qorymyzǵa da áser etti. Tergeý nátıjesinde OF «Asar Úme» resmı túrde jábirlenýshi tarap dep tanyldy», delingen habarlamada.
«Asar Úme» qory ózderiniń áleýmettik jelidegi paraqshasynda istiń mán-jaıyn tolyq jarııalaı almaıtyndaryn, biraq ádildik ornaıtynyna senim bildirip, kinálilerdiń zań aldynda jaýap beretinine úmit artty.
Esterińizge sala keteıik, «Biz Birgemiz Qazaqstan 2030» qorynyń alaıaqtyq áreketteri anyqtalǵannan keıin, Ádilet mınıstrligi bul qordyń taratylatynyn habarlaǵan edi.