Astanada Jastar saraıynda Torǵaı óńiri ónerpazdary ónerlerin pash etip, konsert ótkizdi, dep jazady Egemen.kz.
Kesh áıgili «Ǵasyrlar pernesi» ansambliniń oryndaýyndaǵy «Aqsaýyt» kúıimen ashyldy.
Jangeldın aýdany ákiminiń orynbasary Erenbol Almatov jarty ǵasyrlyq tarıhy bar ansamblge Qazaqstannyń halyq aqyny Qonysbaı Ábildiń esimi berilgenin atap ótti.
Konsert barysynda Nurhan Ahmetbekov atyndaǵy Mádenıet úıiniń ónerpazdary «Ulylar izimen» atty prologyn usynyp, ulttyq muraǵa degen erekshe qurmet kórsetti. Budan bólek, «Balqadısha» jetigenshiler toby, «Erkenaz» úlgili bı ansambli, Baqytjan Baıqadamov atyndaǵy kameralyq hor, respýblıkalyq jáne halyqaralyq baıqaýlardyń laýreattary óner kórsetti. Kúı tartys sheberleri Ádil Aqanov pen Perızat Qalabaıqyzynyń oryndaýy kórermendi tánti etti.
Kesh barysynda Ahmet Baıtursynulynyń 150 jyldyǵyna arnalǵan «Ahmet ánderi» baıqaýynyń jeńimpazdarynyń jáne jergilikti kompozıtorlardyń shyǵarmalary oryndaldy. Sonymen qatar, halyqaralyq baıqaýlardyń laýreaty Jáýke Ońdaǵannyń oryndaýyndaǵy Qonysbaı Ábildyń áıgili «Bala mahabbaty» áni oryndaýshysyn endi tapqandaı áser berdi.
Budan bólek, respýblıkalyq baıqaýlardyń jeńimpazy Farıza Búrkitbaıdyń oryndaýynda Bolat Hamzınniń «Sholpanym – juldyzym», Serikbolsyn Ábikenniń oryndaýynda «Uıalmashy, qalqataı» ánderiniń tusaýy kesildi.
Konsert sońynda Almas Seıilhan, Almas Nurlan, Farıza Búrkitbaı, Meırambek Beısenbek, Mıras Ábdikárim sekildi birqatar ónerpazdarǵa Mádenıet jáne aqparat mınıstrligi men Oqý-aǵartý mınıstrliginiń Alǵys hattary tabystaldy.
Astana qalasynyń ardagerleri, halyq aqyny Qonysbaı Ábildiń týystary jáne Torǵaı selosynyń 1964 jyly týǵan azamattary ónerpazdarǵa yqylas gúlderin tartý etti.
Ánge toly syrly kesh – Torǵaı ónerpazdarynyń asqaq rýhy men ónerin pash etken umytylmas mádenı oqıǵa retinde este qaldy.