Almatyda «Taza Qazaqstan» jalpyulttyq baǵdarlamasy men «Almaty – bizdiń ortaq úıimiz» qalalyq bastamasy aıasynda atmosferalyq aýany qorǵaýǵa baǵyttalǵan «Taza aýa» aksııasy bastaldy, dep jazady Egemen.kz.
Bastamanyń maqsaty – avtokólikterden bólinetin zııandy zattardyń deńgeıin baqylaý. Almatyda aýanyń lastanýynyń edáýir bóligi kólik tútininen bolǵandyqtan, bul másele erekshe mańyzdy.
Qazirgi tańda Almaty qalasynyń Ekologııa jáne qorshaǵan orta basqarmasy arnaıy uıymdardy tarta otyryp, kólik shyǵaryndylaryn baqylaý jumystaryn kúsheıtti. Qalada 19 stasıonarlyq jáne 3 jyljymaly ekobeket jumys istep tur.
Ekobeket qyzmetkeri Ábdihamıt Amanquldyń aıtýynsha, 2024 jyly 204 996 ólsheý júrgizilgen. «34 708 avtokóliktiń (17%) ýly zattar shyǵarý deńgeıi belgilengen normadan asyp ketkeni anyqtaldy. Osyǵan baılanysty 31 682 ákimshilik hattama toltyryldy», dedi ol.
Ekologııalyq beketterdiń tıimdi jumysynyń nátıjesinde normadan asyp ketetin kólikterdiń úlesi azaıǵany (2020 jyly bul kórsetkish 20%-dan assa, 2024 jyly shamamen 17%) baıqalady. Bul sharalar qala ekologııasyn jaqsartýǵa baǵyttalǵan mańyzdy qadamdardyń biri bolmaq. Aıta keteıik, 1 naýryz ben 1 sáýir aralyǵynda Almatyda «Almaty – bizdiń ortaq úıimiz» ekologııalyq naýqany ótip jatyr. Onyń aıasynda qala ortasyn kórkeıtý jáne ekologııalyq jaǵdaıdy jaqsartýǵa arnalǵan kóptegen is-shara josparlanǵan.