Zamanaýı ınnovasııalyq tehnologııalardy qoldaný salyqtyq ákimshilendirýdi damýdyń sapaly jańa deńgeıine kóteredi. Máselen, táýekelderdi basqarý júıesin engizýdiń arqasynda QR QM Memlekettik kirister komıteti 2024 jyly 300 mıllıard teńgeden astam somaǵa taýarlardy naqty jóneltýsiz jáne qyzmetter kórsetýsiz shot-faktýralar jazyp bergen 2 myńnan astam salyq tóleýshiniń qyzmetin anyqtady, dep habarlaıdy Egemen.kz vedomstvonyń baspasóz qyzmetine silteme jasap.
Vedomstvonyń málimetinshe, Abaı oblysynda bar bolǵany 10 gektar egistik alqaby bar sharýa qojalyǵy jalǵan shot-faktýralardy paıdalana otyryp, 2 myń tonna kúnbaǵys tuqymyn satqan. Bul rette bir gektardyń naqty ónimdiligi 1,3 tonna tuqymdy quraǵan. Osylaısha fermer satylymdy 153 ese asyrǵan. Keıinirek salyq tóleýshi ónimniń satylmaǵanyn jáne shot-faktýralar alynyp tastalǵanyn moıyndaǵan.
«Taýarlar men qyzmetterge jazylǵan shot-faktýralardy tekserý nátıjesinde salyq tóleýshiler jumysshylarsyz, qajetti materıaldyq bazasyz jáne úshinshi tulǵalardyń qyzmetterin tartpaı qurylys qyzmetterin kórsetetin jaǵdaılar anyqtaldy. Taǵy bir mysal – bir aıdan az ýaqyt buryn qurylǵan kompanııa aǵylshyn tili kýrstaryna 3,5 mlrd teńge somasynda shot-faktýralar jazdy, ony ol nebári 24 kúnde ótkizdi. Keıinnen osy kompanııany tirkeý jaramsyz dep tanyldy», delingen habarlamada.
Aıta keteıik, Adal bıznesti qorǵaý úshin MKK elektrondyq shot-faktýralardy (EShF) jazyp berý kezinde bıometrııalyq sáıkestendirýdi paıdalaný jónindegi pılottyq jobany qosa alǵanda, sıfrlyq sheshimderge basa nazar aýdara otyryp, aldyn alý sharalaryn engizedi. Qazirgi ýaqytta sáıkestendirýden ótpegen 2 myń adamnyń EShF jazyp berý áreketterin boldyrmaýǵa múmkindik týdy.
Budan basqa, jańa Salyq kodeksiniń jobasynda QQS ákimshilendirýdi jaqsartý úshin EShF avtomattandyrylǵan baqylaýyn engizý josparlanǵan.
«Júıe naqty ýaqyt rejıminde derekterdi taldaıdy jáne salyq tóleýshiniń QQS balansyn esepteıdi. Eger EShF jazyp berý zańdy shyǵyndarmen rastalmasa, qujatty salyq tólengennen keıin ǵana rásimdeýge bolady. Bul tásil jalǵan mámilelerdiń aldyn alady, al baqylaý mehanızmi adal qatysýshylardy shektemeı, táýekel tobyndaǵy salyq tóleýshilerge qoldanylady», dep habarlady Memlekettik kirister komıtetiniń baspasóz qyzmeti.