Ishki ister mınıstrligi Almaty áýejaıynda bolǵan oqıǵaǵa qatysty pikir bildirdi, dep habarlaıdy Egemen.kz aqparat agenttigi.
Qolyna pyshaq ustaǵan er adam áýejaı qyzmetkerin kepilge alyp, rıýkzagynda "bomba" bar dep jolaýshylardy qorqytqan. Atalǵan fakt boıynsha úsh qylmystyq is qozǵaldy: Kepilge alý (QR QK-niń 261-baby 2-bóligi 4-tarmaǵy) - múlki tárkilenip, 7 jyldan 12 jylǵa deıingi merzimge bas bostandyǵynan aıyrý jazasy kózdelgen.
Qarý qoldaný arqyly jasalǵan buzaqylyq (QR QK-niń 293-baby 3-bóligi) - 3 jyldan 7 jylǵa deıingi merzimge bas bostandyǵynan aıyrý jazasy qarastyrylǵan.
Terrorızm aktisi týraly kórineý jalǵan habarlaý (QR QK-niń 273-baby) - 5 000 AEK mólsherinde aıyppul nemese 5 jylǵa deıin bas bostandyǵynan aıyrý. Vedomstvoda habarlaǵandaı, oqıǵanyń mán-jaıyn tekserý úshin jedel-tergeý toby quryldy. Zardap shekkender joq. Sot sheshimimen kúdiktige qatysty eki aıǵa qamaýda ustaý týraly bultartpaý sharasy sanksııalandy.
Sonymen qatar Ishki ister mınıstri Erjan Sadenovtyń tapsyrmasymen eldegi áýejaılar men vokzaldardaǵy qaýipsizdik júıesi tekserilýde. Negizgi nazarda: osal tustardy anyqtaý; qaýiptiń aldyn alý; baqylaýdy kúsheıtý; áreket etý algorıtmin jetildirý; kúzet qyzmetkerlerin oqytý; quqyq qorǵaý organdarymen ózara is-qımyldy nyǵaıtý. IIM jaǵdaı tolyq baqylaýda ekenin, bolashaqta mundaı oqıǵalardyń aldyn alý úshin barlyq qajetti sharalar qabyldanatynyn atap ótti.