Qazaqstannyń medıa salasynda mańyzdy ózgeris oryn almaq. Mádenıet jáne aqparat mınıstri Aıda Balaeva «EL ARNA» jáne «Habar» telearnalaryn biriktirý týraly strategııalyq sheshim qabyldanǵanyn málimdedi. Bul qadam otandyq telekompanııalardyń tıimdiligin arttyryp, qazaqstandyq kontent aýdıtorııasyn keńeıtýge baǵyttalǵan, dep habarlaıdy Egemen.kz.
Mınıstrdiń habarlaýynsha, «EL ARNA» jáne «Habar» telearnalaryn biriktirý 2025 jyldyń 1 mamyryna deıin aıaqtalady. «EL ARNA»-nyń barlyq qundy kontenti «Habar» arnasynyń efırine ótedi.
«Bul úzdik jobalardyń saqtalýyna, olardy keń aýdıtorııaǵa qoljetimdi etýge jáne odan ári damytýǵa múmkindik beredi. «EL ARNA» telearnasy otandyq kórkem jáne derekti fılmder, serıaldar, sondaı-aq mádenı-aǵartýshylyq baǵdarlamalar kórsetiletin platforma retinde mańyzdy mıssııa atqardy. Biz bul arnanyń ulttyq kınematografııa men televızııanyń damýyna qosqan úlesin joǵary baǵalaımyz», dep jazdy Aıda Balaeva.
Mádenıet jáne aqparat mınıstrligi «EL ARNA» telearnasynyń ujymyna kópjyldyq eńbekteri, kásibılik pen otandyq medıa keńistikti damytýǵa qosqan úlesteri úshin shynaıy alǵysyn bildirdi.
Aıta keteıik, qaıta uıymdastyrý prosesi barysynda barlyq qyzmetkerler «Habar» agenttigine jumysqa ornalastyrylady. Jalaqy deńgeıi saqtalyp, olardyń tájirıbesi men bilimi jańa jobalarda suranysqa ıe bolady.
«EL ARNA» telearnasynyń baǵdarlamalaryn óndirý jáne taratýǵa bólingen qarjy «24KZ» jáne «Habar» sııaqty strategııalyq mańyzdy telearnalardyń kontentin kúsheıtýge jáne tehnıkalyq bazasyn ýaqtyly jańartýǵa qaıta bólinedi. «EL ARNA» telearnasynyń qyzmetine atsalysqan barsha jandarǵa shynaıy rızashylyǵymdy bildiremin jáne aldaǵy ýaqytta jańa jetistikter, shyǵarmashylyq shabyt pen tolaıym tabys tileımin!», dedi Mádenıet jáne aqparat mınıstri.
Esterińizge sala keteıik, «EL ARNA» telearnasy 2000 jyldyń 22 naýryzynda alǵashqy ulttyq memlekettik tildegi arna retinde «Habar-2» ataýymen quryldy.
2002 jyldyń naýryzynda ataýy «EL ARNA» bolyp ózgertilip, eki tilde habar taratýǵa kóshti.
2014 jyldyń naýryzynda arna óz jumysyn toqtatyp, onyń jıiliginde «24KZ» jańalyqtar telearnasy iske qosyldy.
2017 jyldyń 27 naýryzynda «EL ARNA» jańa formatta otandyq kınoarna retinde qaıta iske qosylyp, 2024 jyldan bastap «EL ARNA» jastarǵa arnalǵan oıyn-saýyq arnasy retinde qaıta qurylymdaldy.