Almatyda respýblıkalyq «Taza Qazaqstan» baǵdarlamasy men qalalyq «Almaty – ortaq úıimiz» bastamasy aıasynda jyljymaly ekohab uıymdastyryldy.
Ekohab barysynda qala turǵyndary plastıkti qaıta óńdeýmen tanysyp, ekologııalyq jaýapkershilik týraly maǵlumat aldy. Plastık buıymdardy fandomatqa ótkizip, aqshalaı syıaqy alý múmkindigin de synap kórdi.
Panfılov kóshesinde byltyr qala ákimdiginiń jobalyq keńsesiniń qoldaýymen alǵashqy fandomat ornatylǵan bolatyn. Sodan beri bul oryn ekologııalyq bastamalardyń ortalyǵyna aınalǵan.
Eco Network jobasynyń negizin qalaýshy Evgenıı Muhamedjanov mundaı bastamalar qala turǵyndaryna ekologııalyq ádetterdi úırenýge yqpal etedi. Aıtýynsha, fandomattar – bul plastık qaldyqtarynan qutylýdyń yńǵaıly ádisi ǵana emes, sonymen qatar qorshaǵan ortaǵa sanaly kózqarasty qalyptastyrýdyń quraly. Adamdardyń qarapaıym áreketi de ekologııany jaqsartýǵa úles qosa alatynyn túsingenin qalaımyz. Qaldyqtardy qaıta óńdeý bir rettik emes, kúndelikti ómirdiń bir bóligine aınalýy tıis. Osy rette qala turǵyndary ekologııalyq bolashaqqa qaraı qadam jasap keledi.
Ekohab belsendisi, 5-synyp oqýshysy Ilııas Ahmetovtyń aıtýynsha, ár aýlada osyndaı apparattar ornatylsa, eshkim plastık bótelkelerdi jaı ǵana qoqysqa tastamas edi. «Ekologııa týraly buryn oılanbaǵan dostarymnyń ózi qyzyǵa bastady. Biz mektepten keıin plastık jınap, ony ótkizip turýǵa kelistik» deıdi ol.
Ekohab almatylyqtar arasynda ekologııalyq ádetti nasıhattaýǵa baǵyttalǵan mańyzdy qadam bolyp otyr. Uıymdastyrýshylar mundaı sharalardy qoǵamdyq oryndarda ǵana emes, saýda ortalyqtarynda, saıabaqtarda jáne qalalyq alańdarda ótkizip, múmkindiginshe qorshaǵan ortany qorǵaý isine qala turǵyndary men qonaqtardy kóptep tartýdy josparlap otyr.
ALMATY