Naýryz aıyndaǵy ulttyq biryńǵaı testileý (UBT) ótip jatyr. Ǵylym jáne joǵary bilim mınıstrliginiń habarlaýynsha, aralyq qorytyndy nátıjesinde bir aptadan asa ýaqyttyń ishinde testini 21 myńǵa jýyq talapker tapsyrdy.
Naýryz aıyndaǵy UBT-nyń birinshi aptasynda 21 myńǵa jýyq adam testileýden ótti. Onyń ishinde 69 talapker – erekshe bilim berý qajettilikteri bar oqýǵa túsýshiler. Qatysýshylardyń 62,8%-y testileýdi qazaq tilinde, 37%-y orys tilinde, 52 adam aǵylshyn tilinde tapsyrýdy tańdady. Talapkerlerdiń basym bóligi, atap aıtqanda, 18,4%-y «Matematıka-Fızıka» pánder kombınasııasyn tapsyrdy. 16,1%-y «Shyǵarmashylyq emtıhan», 12% «Bıologııa-Hımııa» kombınasııasyn tańdaǵan. Eń az tańdalǵan kombınasııa – «Hımııa-Fızıka». Shekti baldy 57%-ǵa jýyq talapker jınady. Testileý nátıjesi boıynsha ortasha ball 53 baldy (bes pán boıynsha) qurady. Eń joǵary ball – 135, muny Abaı oblysynyń oqýshysy jınady.
Talapkerler testileý aıaqtalǵan soń 30 mınýt ishinde apellıasııaǵa bere alady, bul jaǵdaıda sertıfıkat apellıasııa týraly sheshim qabyldanǵannan keıin testilenýshiniń jeke kabınetinde qoljetimdi bolady.
Ulttyq testileý ortalyǵynyń taratqan aqparatyna súıensek, qazirgi tańda 22 adamnyń nátıjesi joıyldy. Onyń ishinde 10 talapker smartfon jáne shpargalka sııaqty tyıym salynǵan zattardy alyp ótý áreketi saldarynan test tapsyrý múmkindiginen aıyryldy, al testileý kezinde erejelerdi buzǵany úshin aýdıtorııadan 12 adam shyǵaryldy.
Aıta ketsek, bıylǵy UBT aıaqtalǵannan keıin kúntizbelik jyldyń 31 qazanyna deıin testileýdiń beınejazbalaryna taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda túsýshiniń UBT nátıjeleri joıylady.
Naýryz UBT-sy 1 naýryz ben 6 sáýir aralyǵynda ótedi. Testileýge qatysýǵa 163 myńǵa jýyq talapker nıet bildirgen.