Búgin Býrabaıda Qasym-Jomart Toqaevtyń qatysýymen Ulttyq quryltaıdyń IV otyrysy ótip jatyr, dep jazady Egemen.kz.
Jıynda sóz alǵan Prezıdent keıingi úsh jylda jergilikti bıliktiń túbegeıli jańǵyrǵanyn atap ótti.
«Jergilikti bılik túbegeıli jańǵyrtyldy. Úsh jyldan astam ýaqyt ishinde aýyl ákimderiniń 72 paıyzy jańardy. Onyń úshten biri – buryn memlekettik qyzmette bolmaǵan azamattar. Bir sózben aıtsaq, aımaqtardaǵy atqarýshy bılikke jańa adamdar kelip jatyr.Pılottyq joba retinde aýdandar men oblystyq mańyzy bar qalalardyń 45 ákimi saılandy. Bıyldan bastap barlyq aýdan ákimderin halyq tikeleı saılaıtyn bolady. Túrli deńgeıdegi máslıhat saılaýy ókildi bılik organdarynyń jumysyna tyń serpin berdi. Oblystyq jáne aýdandyq máslıhat depýtattarynyń 90 paıyzy bir mandatty okrýgten, ıaǵnı tikeleı daýys berý arqyly saılandy. Bılik júıesinde mundaı aýqymdy ózgeris buryn-sońdy bolmady», dedi Prezıdent.
Memleket basshysy el ishindegi oń ózgeristerge Ulttyq quryltaı músheleri de eleýli úles qosyp jatqanyna nazar aýdardy.
«El ishindegi ózgeristerge Ulttyq quryltaı músheleri de orasan zor úles qosty. Jurtymyzdy ortaq maqsatqa uıystyryp, ıgi isterge jumyldyrdy. Alqaly jıyn alǵashqy kúnnen bastap jalpyhalyqtyq jańǵyrýdyń sımvolyna aınaldy. Qoǵamdyq dıalogtyń jańa úlgisi qalyptasty. О́zara túsinistik pen qurmet bar jerde kelisim bolady. Quryltaıdyń túpki maqsaty da – osy», dedi Qasym-Jomart Toqaev.