Ulttyq quryltaıdyń IV otyrysynda Memleket basshysy Qasym-Jomart Toqaev Úkimet salyq reformasyna qatysty jańa tásilderdi usynǵanyn, sondaı-aq onda negizgi ekonomıkalyq jáne áleýmettik faktorlar eskerilgenin atap ótti, dep habarlaıdy Egemen.kz.
«Kásibı mamandar da, jalpy jurtshylyq ta qosymsha qun salyǵynyń mólsherlemesin kóterý qajettigine túsinistikpen qaraıdy. Degenmen usynylǵan sharalarǵa, sonyń ishinde, qosymsha qun salyǵyna qatysty syn-pikirler de estilip qalady. Biraq mundaı paıym shynaıy ahýalǵa negizdelmegen», dedi Qasym-Jomart Toqaev.
Memleket basshysy túrli sebepke baılanysty ózine aýqymdy áleýmettik mindetteme almaıtyn elder az emestigin, sondaı-aq Qazaqstannyń bıýdjet qarjysynyń jartysynan kóbi áleýmettik salanyń enshisinde ekenin tilge tıek etti.
«Bizdiń elimiz – áleýmettik memleket. Sondyqtan bilim berý, densaýlyq saqtaý salalaryna ınvestısııa salýdy jalǵastyramyz. Bul – bizdiń konstıtýsııalyq mindetimiz. Biraq shyn muqtaj azamattarǵa ǵana kómek kórsetilýi kerek. Qyzmetin asyra paıdalanýǵa, alaıaqtyqqa jol berilmeıdi. Sondyqtan basymdyq berilmegen jobalarǵa bólinetin qarjy azaıady. Bul qajet shara ekeni aıdan anyq. Úkimet osy jyldyń sońyna deıin ony qalaı ońtaılandyrý kerektigin birjola anyqtap alýǵa tıis», dedi Prezıdent.