Memleket basshysy Ulttyq quryltaıdyń IV otyrysynda áıelder men balalardyń quqyqtaryn qorǵaý, sondaı-aq turmystyq zorlyq-zombylyqtyń aldyn alý baǵytynda qabyldanǵan sharalar týraly málimdedi, dep habarlaıdy Egemen.kz.
Prezıdenttiń aıtýynsha, ótken jyly elimizdiń barlyq aımaǵynda balalarǵa Psıhologııalyq qoldaý ortalyqtary ashylyp, zańdarǵa mańyzdy ózgerister engizildi. Turmystyq zorlyq-zombylyqpen kúreske qatysty zań qabyldanǵannan keıin jaǵdaı birshama jaqsarǵanymen, shalǵaı aýdandarda áli de keleńsiz oqıǵalar oryn alyp jatyr.
«Jergilikti bılik ókilderi men qoǵam belsendileri turmystyq zorlyq-zombylyqtyń aldyn-alý jumysynan shet qalyp otyr. Onyń ústine, osy baǵyttaǵy jumystar qazir ártúrli qujatpen retteledi. Shashyrańqy bolyp tur bári. Sonyń bárin bir jerge jınaqtaǵan durys dep oılaımyn. Osyǵan oraı «Qazaqstan balalary» atty birtutas baǵdarlama qabyldaǵan jón», dedi Memleket basshysy.
Sonymen qatar, Prezıdent bilim men tárbıeniń qatar júrýiniń mańyzdylyǵyn atap ótti.
«Ozyq oıly urpaq ósirý úshin bilim men tárbıe árdaıym qatar júrýi kerek. Ashyǵyn aıtsaq, bala oqytý isinde buǵan deıin bilimge kóbirek nazar aýdaryldy. Al urpaq tárbıesine qatysty júıeli ustanym bolǵan joq. Bul salaǵa tıisti deńgeıde kóńil bólinbeı keldi. «Tárbıesiz berilgen bilim – adamzattyń qas jaýy». Sondyqtan bilimmen qatar tárbıege aıryqsha nazar aýdarý óte mańyzdy», dedi ol.
Osy maqsatta byltyr mektepterde «Birtutas tárbıe» baǵdarlamasy iske qosylǵan edi. Bul rette Memleket basshysy atalǵan qujatty barlyq memlekettik jáne jekemenshik bilim berý mekemelerine engizý qajettigin aıtty.
«Jobanyń túpki maqsaty – otanshyl, bilimdi, jasampaz urpaq tárbıeleý. Munyń bári – adal azamatqa tán qasıetter. Quryltaı músheleri aldaǵy ýaqytta osy baǵdarlamany «Adal azamat» dep ataýdy usynyp otyr. Men bul usynyspen tolyq kelisemin», dedi Qasym-Jomart Toqaev.