2019 jyldan beri elde 500-den asa mektep, kóptegen medısına, sport jáne basqa da áleýmettik nysandar boı kótergen. Bul týraly Prezıdent Qasym-Jomart Toqaev Býrabaıda ótken Ulttyq quryltaıdyń otyrysyndaǵy sózinde aıtty, dep habarlaıdy Egemen.kz aqparat agenttigi.
Memleket basshysynyń sózinshe, 2019 jyldan beri Qazaqstan ekonomıkasynyń naqty ósimi 15,5 paıyz boldy.
- Elimizdiń ishki jalpy ónimi 288 mıllıard dollarǵa jetti, al jan basyna shaqqandaǵy ishki jalpy ónim 46 paıyzǵa jýyq artyp, 14 myń dollardan asty. Syrtqy saýda aınalymy 45 paıyzǵa jýyq ósip, 140 mıllıard dollar boldy. Negizgi kapıtalǵa salynatyn ınvestısııa bir jarym esege ulǵaıdy. Byltyr onyń kólemi 19 trıllıon teńgeden asty, - dedi Q.Toqaev.
Ol bilim-ǵylym salasyna 5 eseden astam, kólik salasyna 3 esege jýyq, densaýlyq saqtaý jáne áleýmettik qyzmet kórsetý salasyna 3,5 ese kóp ınvestısııa salynǵanyn jetkizdi.
- Osy ýaqytta 500-den astam mektep boı kóterdi. Kóptegen densaýlyq saqtaý, sport jáne basqa da áleýmettik nysandar ashyldy. 4400 shaqyrymǵa jýyq avtokólik joldary salyndy jáne jóndeldi. Jańa temir jol jelileri paıdalanýǵa berildi. Ondaǵan óndiris orny iske qosyldy, - dep atap ótti Prezıdent.