Búgin úsh júzdiń basyn qosqan kıeli Ordabasy aýdanynda 14 naýryz – Amal merekesine oraı zııaly qaýym ókilderi, el aǵalary men ardaqty analary bas qosyp, dástúrli merekeni erekshe sán-saltanatpen atap ótti, dep jazady Egemen.kz aqparat agenttigi.
Temirlandaǵy «Shámshi» alleıasynda ótken sharaǵa qos óńirdiń ardagerleri men batagóı aqsaqaldary, zııaly qaýym ókilderi men ónerpazdary qatysty. Kórisý rásimimen bastalǵan jıyn aqyndardyń arnaý jyrlaryna jalǵasty. Túrkistan oblysynan Aıan Nııazbek pen Shymkent qalasynan Meıirjan Jaqyp Naýryz meıramynyń mán-mańyzyn, eki aımaqtyń tarıhy men búgingi jetistikterin jyrǵa qosty.
Eki óńirdiń Ardagerler keńesiniń tóraǵalary Jeńisbek Máýlenqulov pen Kenjehan Tólebaev merekemen quttyqtap, jyly lebizderin bildirdi. Naýryzdyń 10 kún boıy ıgi istermen órnektelip jatqanyn aıtyp, «Ulys oń bolsyn!» degen tilekterin jetkizdi. Sonymen birge Ordabasy aýdanynyń ákimi Azat Oralbaev Amal kúniniń mánine toqtalyp, kópshilikti quttyqtady.
Jurtshylyqqa kóterińki kóńil-kúı syılaǵan ónerpazdar halyq ánderin, kúı, terme, bı, sondaı-aq qazaq estradasynyń tanymal shyǵarmalaryn oryndap, merekeniń kórkin qyzdyrdy. «Súgir» atyndaǵy qazaq ulttyq aspaptary orkestri men «Qazyna» bı ansambli óz ónerlerin pash etti. Túrkistan oblysy mádenıet basqarmasy uıymdastyrǵan shara sońynda patrıottyq ánder oryndalyp, jıyn úlken birlik pen yntymaqtyń belgisine aınaldy.
Amal kúni – ulttyq dástúrimizdiń mańyzdy kórinisi. Bul merekede halyq bir-birine izgi tilek aıtyp, jaqsylyq tilep, birlikti nyǵaıtady. Túrkistan men Shymkenttiń zııaly qaýymy osy dástúrdi jandandyrý jolynda ıgi is jasady. Qos tarap bir-birlerine syı usynyp, Amal kúnimen quttyqtady. Bul ıgi dástúr – ulttyq ereksheligimiz ǵana emes, ǵasyrlarǵa jalǵasyp kele jatqan urpaqtar sabaqtastyǵynyń altyn kópiri ekenin aıtyp, elge amandyq, birlik, bereke tiledi.