Qazaqstan Respýblıkasynyń Memlekettik kirister komıteti ońtaılandyrý shemalaryn paıdalanatyn salyq tóleýshilerden negizsiz salyqtyq paıda alýdy anyqtaý jáne jolyn kesý jóninde belsendi jumystardy jalǵastyrýda, dep jazady Egemen.kz aqparat agenttigi.
Esterińizge sala keteıik, buǵan deıin taldaý qorytyndysy boıynsha 633 salyq tóleýshige, onyń ishinde 172 qurylys salasynda jáne 102 saýda salasynda jumys isteıtin jáne ózge de kompanııalarǵa salyq salynatyn kiristi tómendetý belgilerimen habarlamalar qoıylǵan bolatyn.
Salyq tóleýshilerdi irikteý kezinde tómen salyq júktemesi, arnaýly salyq rejımin qoldanatyn ónim berýshilerde (mundaı ónim berýshilermen ózara esep aıyrysý 150 mln. teńgeden asqan jaǵdaıda) jaldamaly jumysshylary men aktıvteriniń bolmaýy, sondaı-aq óz qyzmetkerlerinen jumystar men qyzmetterdi satyp alý jáne olardy kórsetýdiń tómen yqtımaldyǵyn kórsetetin basqa da ólshemsharttar eskerildi.
Táýekeli joǵary jetkizýshilerdiń taldaýy jergilikti salyq organdaryna salyq tóleýshilermen salystyrý júrgizý úshin jetkizildi.
Mysal retinde, «A» JShS 2022-2023 jyldar kezeńinde qurylys-montajdaý jumystary boıynsha 1,6 mlrd teńge somasyna bir mezgilde osy JShS-nyń qyzmetkerleri bolyp tabylatyn 22 JK-men ózara esep aıyrysýy bar.
Bul rette 688 mln teńgege 11 JK-de 1 jaldamaly qyzmetker bar nemese múldem joq. Bul rette, kórsetilgen qyzmetter aıtarlyqtaı eńbek resýrstaryn tartýdy talap etti.
Sonymen qatar, 485 mln teńgege 23 ónim berýshi "A" JShS-men bir kompıýterden (qurylǵydan) SEN tapsyrǵan nemese EShF jazyp bergen. Sondaı-aq, 15 ónim berýshi 167 mln teńgege menshiginde nemese jalǵa alýynda joq arnaıy tehnıka men úı-jaılardy jalǵa berý qyzmetterin kórsetken.
Memlekettik kirister komıteti salyqtyq buzýshylyqtarǵa qarsy óz qyzmetin jalǵastyrýda jáne salyq tóleýshilerdi salyqtardy tolyq jáne ýaqtyly tóleý arqyly salyq zańnamasynyń talaptaryn qatań saqtaýǵa shaqyrady.
Jalǵan shot-faktýralardy jazyp berý salyq zańnamasyn buzý ǵana emes, sonymen qatar Qazaqstan Respýblıkasynyń zańnamasyna sáıkes qylmystyq jaýaptylyqqa ákep soǵatynyn qosymsha eske salamyz.