Búgin Májilistiń jalpy otyrysynda depýtat Ermurat Bapı elimizdegi saıası reformalardyń atqarylý barysy týraly pikirin ortaǵa saldy, dep jazady Egemen.kz.
Depýtat Qazaqstandaǵy reformalar baıaý bolsa da qadaý-qadaý atqarylyp jatqanyn aıtty. Ol bul qatarda Prezıdent bastamasymen 20 jyldan keıin qalpyna keltirilgen bir mandatty mojarıtarlyq saılaý jáne saılaný múmkindigin atap ótti.
«Budan úsh jyl buryn elimizdi sharpyp ótken qaıǵyly Qańtardan keıin naqty jáne batyl qolǵa alynǵan ózgerister dáýiriniń qaınar kózi – saılaý júıesinen bastaldy. Saıası bıliktiń bul sheshimin kimder ásire asqaqtatyp, al syndarly qoǵamda endi bireýler qandaı qyjylmen aıtsa da, táýelsiz kandıdattarǵa múmkindik jolyn ashqan osy – bir mandatty saılaý júıesine Prezıdent Qasym-Jomart Toqaevtyń reformalyq bastamasy muryndyq bolǵany Qazaqstannyń jańa tarıhynda jazylyp qalatyn aqıqat bolmaq», dedi Ermurat Bapı.
Májilismen bılik pen qoǵam ortaq til tabyspaıynsha, «Jańa Qazaqstan» ıdeıasyn tolyqqandy júzege asyrý múmkin emes ekenine toqtalyp, eldegi ózgeristerdiń úsh jyldyq kezeńin saralaǵanda «Ádiletti Qazaqstandy» qalyptastyrý maqsatynda jylystatylǵan aktıvterdi elge qaıtarý bastamasyn birinshi kezekte tilge oralatynyna nazar aýdardy.
«Bul oraıda memleket basshysynyń tapsyrmasymen Parlament jedel túrde tıisti organdardyń oryndaýyna qajetti tıisti zań qabyldap berdi. «Eski júıede» esesi ketken halyqtyń qazynasyn toltyrýdyń qamymen sońǵy eki jyldyń ishinde 2 trıllon teńgege jýyq aktıv qaıtty degen aqparat bar. Sol tıisti organdar qaıtarylǵan qarajat halyqqa qajetti áleýmettik-turmystyq nysandar salýǵa jumsalýda deıdi. «Deıdi» dep, syrttan syrǵyta sóıleýimizge el prezıdenti bastamasyn ýákiletti organdardyń oryndaý barysyna kóńil tolmaǵandyq sebep bolyp otyr. Basqasyn qaıdam, sol eki trıllıonnyń teń jartysyn eki olıgarh qana qaıtarǵan eken. Al prezıdenttiń tilimen aıtqanda, «el qazynasynyń jartysyn ıelenip alǵan olıgarhattan qaıtarylýy tıis aktıvter qaıda», degen depýtat zańnyń júzege asyrý prosesinen ony qabyldaǵandardyń habarsyz qalýyn synady.
Prezıdenttiń tikeleı ókimimen qurylǵan Ulttyq Quryltaı da eldiń damý jolyndaǵy oń serpilis. Quryltaıdyń qoǵam men memlekettik bılik arasyndaǵy dıalogtyq alańǵa aınalǵanyn jýyqta ǵana ótken Býrabaı Quryltaıy taǵy da dáleldedi.
«Jergilikti ákimderdiń saılanyp qoıý jónindegi prezıdenttiń taǵy bir reformalyq bastamasyn tilge tıek etkim keledi. Iá, bul memlekettik basqarý vertıkalyn demokratııalandyrýǵa bastaıtyn batyl qadam bolǵany daýsyz. Halyqtyń ózin-ózi basqarý prınsıpterin órkenıetti álemniń saıası dástúri negizinde qalyptastyrý qaǵıdasy qoǵamda qyzý qoldaýmen qabyldanǵany ras. Biraq osy saılaýdyń nátıjesinde saılanǵan ákimderdiń derbestigi men jergilikti ákimdikterdiń bıýdjet-qarajat júıesin jetildirý baǵytynda áli de kóp jumystar júrgizilýi tıis. Bıýdjetsiz ákim – eskeksiz qaıyqtaı», dep atap ótti Ermurat Bapı.