Naýryz merekesi jaqyndaǵaly el ishi qaýyrt kúıge engen. Keshe ortanshy nemerem WhatsApp arqyly hat joldapty. Túıgenim, mektepte ótetin Naýryz toıyna kıip baratyn ulttyq kıim kerek eken. О́zi buıymtaıyn jıi aıtady. Atasyn shynymen jaqsy kóre me, álde áke-sheshesi úıinde «atańnan sura» dep úıretip otyra ma, ol jaǵy belgisiz. Áıteýir, bir jaqsysy ótinishin ata dep bastaıdy. Ata degen sózge ishiń ýyljyp ketpeı me, aspandaǵy aıdan basqanyń bárin áperýge beıimsiń.
Demalys kúni uzyndy-qysqaly bolyp tirkesip, ortalyq bazarǵa bardyq. Ulttyq kıim úıilip jatyr, ne joq deısiz. Jeletke, beldemshe, óńiri men jaǵa jıegi jáne omyraý tusy kóz jaýyn alatyn túrli jippen kestelegen kájekeı, barqyttan tigilgendikten jup-jumsaq eken. Astary bolsa da jún men maqta salynbaı, yqshamdap tigilipti. Jeńsiz keýdeshe. О́zge de óńi jaqsy kıim jetip artylady. Satyp turǵannyń bári aıyr qalpaq aǵaıynnyń qyz-kelinshekteri.
– О́zderi pysyq-aq, – deıdi bir aqsaqal, – buryn kisi qaıtqanda jyrtys esebinde jumsaıtyn teń-teń mata satýshy edi. Qazaq odan tyıylǵannan keıin qyz jasaýyna kóshti. Endi, mine, ulttyq kıimderimizdi osylardan satyp alatyn boldyq. Men tósekte basy, tóskeıde maly qosylǵan aǵaıyndy jek kórmeımin, qaıta osy pysyqtyǵyn jaqsy kóremin. Osy bazarda biletinderdiń aıtýyna qaraǵanda, eki júzden astam qyrǵyzdyń qyz-kelinshegi saýda jasap júr. Tiksin, satsyn. Biraq ózimizdiń qolóner sheberleri qaıda qarap otyr?
Osy áńgime ári qaraı sabaqtalyp júre bergeni.
– Áldebir merekelerde qolóner sheberleriniń kórmesi ótedi, – deıdi bir ájeı, – bylaı qarasań bar sııaqty ǵoı. Nege solar ózderi tigip, nege usynbaıdy eken? Bizdiń ulttyq kıimimizdiń oıý-órnegi, poshymy ózgeden góri ózimizge jaqyn emes pe?
Nemereme keýdeshe áperemin dep júrip, talaı nárse estidim. Shynynda da, Alataýdyń arǵy betinen kelgen qyrǵyz aǵaıyn bolmasa, ıinimizge iler jibi túzý ulttyq kıim taba almaı jutap júredi ekenbiz ǵoı.