19 aqpanda bastalǵan «Uly Jeńistiń 80 jyldyǵyna – 80 ıgi shara» aksııasy aıasynda UQK Shekara qyzmeti Almaty oblysy boıynsha departamenti Jetisý oblysyna qarasty Úshtóbe qalasyndaǵy Kemel Toqaev atyndaǵy orta mektebine arnaıy at basyn tiredi.
Alapat maıdandy basynan ótkerip, týǵan jerine jeńispen oralǵan qazaq detektıviniń atasy Kemel Toqaevty ulyqtaýǵa arnalǵan sharany atalǵan departament pen «Generaldar keńesi» respýblıkalyq qoǵamdyq uıymy birlesip uıymdastyrdy.
Atalǵan mektepte ótken is-sharaǵa «Generaldar keńesi» respýblıkalyq qoǵamdyq uıymy Prezıdıýmynyń tóraǵasy general-leıtenant B.Sársekov, UQK Shekara qyzmeti Almaty oblysy boıynsha departamentiniń bastyǵy polkovnık Á.Kaıýpov, elimizdegi Jýrnalıstıka akademııasynyń akademıgi – Qazaqstan Jazýshylar odaǵy tóraǵasynyń keńesshisi N.Nurǵazın, shekarashy ardagerlerdiń «Zastava tarlandary» respýblıkalyq qoǵamdyq birlestigi Almaty qalalyq fılıalynyń tóraǵasy zapastaǵy polkovnık A.Munalbaevtar qatysty.
Sonymen qatar, jıynǵa qatysýshylardyń qatarynda departamentke qarasty «Serjanttardy daıarlaý mektebinde» kásibı biliktilikterin arttyrý kýrsynan ótip jatqan áskerı qyzmetshilermen birge «Jas shekarashy» áskerı-patrıottyq klýbynyń músheleri boldy.
Jazýshy atyndaǵy májilis zalda ótken alqaly jıynda sóz sóılegen departament bastyǵy Álibek Kaıýpov: «Kemel Toqaev – jazýshy ǵana emes, batyr, ádilettilik pen adaldyqtyń sımvoly. Onyń ómiri men shyǵarmashylyǵy – qaısarlyqtyń, otansúıgishtiktiń jáne týǵan jerge degen súıispenshiliktiń aıqyn úlgisi», dep atap ótti.
Detektıv janrynyń darabozy retinde tanymal kórnekti jazýshynyń soǵys taqyrybynda kólemdi týyndysynyń biri – «Soldat soǵysqa ketti» romany ekeni belgili. О́ıtkeni, qanǵa bókken shaıqas alańy jan-jaqty sýrettelip, arasynda soldat kúndeligimen árlenip otyratyn kitapty boıyń shymyrqanbaı oqý múmkin emes. Al, «Juldyzdy joryq», «Qys qarlyǵashy», «Bolashaq týraly oılar», «Túnde atylǵan oq», «Qastandyq», «Arnaýly tapsyrma», «Sarǵabanda bolǵan oqıǵa», «Tańbaly aqyn» povesteri jáne «Sońǵy soqqy», «Soldat soǵysqa ketti», «Uıasynan bezgen qus» romandary qalamgerdiń sýretkerlik sheberligin aıǵaqtaı túsedi.
Alqaly jıynnan keıin qonaqtar Kemel Toqaevtyń «Túnde atylǵan oq» shyǵarmasy boıynsha sahnalanǵan qoıylymdy tamashalady.
Budan keıin mektep oqýshylary maıtalman sýretkerdiń shyǵarmalaryna negizdelgen «Jazýshy álemine saıahat» atty zııatkerlik oıyn uıymdastyrdy.
Mańyzdy sharanyń taǵy bir ereksheligi, jınalǵan qaýym jazýshynyń kabınet-murajaıyn kórip, onyń shyǵarmalary men tutynǵan jeke zattarymen tanysty. Al, Álibek Amangeldiuly murajaıǵa departament atynan shekarashylardyń el shebindegi qyzmeti beınelengen kartınany syıǵa tartty.
Shara sońynda «Generaldar keńesi» respýblıkalyq qoǵamdyq uıymynyń tóraǵasy general-leıtenant B.Sársekov pen departament bastyǵy Á.Kaıýpov bastaǵan mártebeli qonaqtar Kemel Toqaev alleıasyna aǵash kóshetterin otyrǵyzdy.
Osylaısha, Uly Jeńistiń 80 jyldyǵyna baılanysty uıymdastyrylǵan shara máresine jetti. Bıyl 102 jasqa tolatyn kórnekti qalamgerden eń bastysy, bizdiń shekarashylar úlgi alyp, el tynyshtyǵy úshin qyzmet etetin otansúıgish azamat bolýǵa meılinshe talpynady dep senemiz.
Tamara DÁÝLETBAEVA,
UQK Shekara qyzmetiniń zapastaǵy podpolkovnıgi.