Elordada «Deeptech báıge» baıqaýy qorytyndylandy. Saıystyń jalpy júlde qory 35 mln teńgeni qurady. Nazarbaev ýnıversıtetinde (NU – Nazarbayev University) ótken fınalǵa Premer-mınıstrdiń orynbasary Ermek Kósherbaev, stýdentter, zertteýshiler, bilim, ǵylym jáne bıznes ókilderi qatysty.
«Deeptech báıge» baıqaýy – ınkýbasııa, akselerasııa, Jas Venture, Go Abroad jáne basqalary sııaqty NU startaptaryn qoldaý baǵdarlamalary túlekteriniń jobalaryn biriktiretin alǵashqy iri, jergilikti is-shara. Baıqaýǵa qatysýǵa ótinimderdi jınaý qańtar aıynyń sońynda bastaldy. 100-ge jýyq ótinish túsip, jetekshi bıznesmender men venchýrlyq ınvestorlardan turatyn qazylar alqasynyń sheshimimen fınalǵa 10 joba ótti. Ǵylymı ázirlemeler men ınnovasııalardy ilgeriletýge, sondaı-aq halyqaralyq deńgeıde básekege qabiletti deeptech-startaptardyń ekojúıesin qalyptastyrýǵa baǵyttalǵan bastamany NU-ǵa qarasty «Áleýmettik damý qory» qoldady.
Fınalda 10 startap joba tanystyryldy, qatysýshylar medısınadaǵy jasandy ıntellektiden bastap, aýyl sharýashylyǵyndaǵy ozyq monıtorıng júıelerine deıin ártúrli salada ınnovasııalyq sheshimder usyndy. Ár joba úsh mınýttyq baıandaýdan (pıtchıngten) ótip, sodan soń startaptyń negizin qalaýshylar qazylar alqasynyń suraqtaryna jaýap berdi. Sarapshylardy jobalardyń ereksheligi, naryqtyq áleýeti, ári qaraıǵy josparlary jáne tanystyrylǵan tehnologııalardy tájirıbelik turǵyda qoldaný máseleleri qyzyqtyrdy.
Uıymdastyrýshylardyń aıtýynsha, qazylar alqasynyń quramy tóraǵasy Premer-mınıstrdiń orynbasary E.Kósherbaev pen ǵylym, bilim, bıznes salalarynyń jetekshi ókilderinen quralǵan. Qazylar sheshimimen syıaqysy 12 mln teńge turatyn birinshi oryndy jaýyngerlik drondardy jasaýǵa arnalǵan ınnovasııalyq platforma – «Game of drones» startapy jeńdi. Bul joba sımýlıasııalar arqyly oqytýdyń neǵurlym qoljetimdi, tıimdi ádisterin paıdalanady. Qazirgi ýaqytta startaptyń 23 elden 10 myńnan asa paıdalanýshysy bar eken. Jobanyń negizin qalaýshy Abylaıhan Jaqanov: «Platforma – kıbersporttyń jańa formaty, munda oıynshylar qozǵalys jasaý arqyly shynaıy tehnıkany basqara alady. Alaıda bul tehnologııanyń áleýeti odan da joǵary: startaptyń sheshimderin agrarlyq sektorda, qorǵanys jáne óndiris salalarynda qoldanýǵa bolady. Osy platforma negizinde komanda ushqyshtardy daıarlaý qunyn aıtarlyqtaı tómendetýdi usynyp otyr. Máselen, áskerı qyzmetkerlerdi daıarlaý shyǵynyn 100 ese azaıtýǵa múmkindik mol», deıdi.
Syıaqysy 10 mln teńge turatyn ekinshi oryn ıegeri – geımıfıkasııa men AI ádisterin qoldaný arqyly ınsýltti qalpyna keltirýge kómektesetin sıfrlyq terapııa júıesi «Flection.AI» startapy. Platformanyń negizin qalaýshy, NU professory Aleksandr Paktiń aıtýynsha, platforma Astanadaǵy klınıkalarmen birlestikte 200 pasıentke synalyp, oń nátıje bergen. Komanda úı jaǵdaıynda ońaltý boıynsha amerıkalyq naryqqa shyǵýdy kózdep otyr.
3-oryn men 8 mln teńgeni «Granulo system» jobasy jeńdi. Bul – taý-ken ónerkásibindegi óndiristik úderisterdi jaqsartýǵa arnalǵan ken fraksııasyn taldaý júıesi. Startap konveıerdegi ken mólsheriniń ornalasýyn baqylaýǵa kómektesedi, bul shar dıirmeniniń, burǵylaý-jarý jumystaryn baqylaýdy jaqsartady.
5 mln teńgelik kórermen kózaıymy syılyǵyn «Hemo lab» medteh-startapy oljalady. Bul – dál dıagnoz qoıý ýaqytyn 10 ese qysqartyp, 95% dáldikpen aýrýlardy erte dıagnostıkalaýǵa arnalǵan SaaS-platformasy.
Sonymen qatar barlyq startap ıeleri tálimgerlik baǵdarlamalaryna qatysý jáne ındýstrııalyq seriktestermen yntymaqtastyq ornatý múmkindikterine de ıe boldy. Bul olarǵa óz jobalaryn keńeıtip, jańa naryqtarǵa shyǵýǵa kómektesedi. Uıymdastyrýshylardyń aqparatyna súıensek, NU aldaǵy ýaqytta elimizdiń basqa ýnıversıtetterin de qosyp, baıqaýdy keńeıtpek. Uzaqmerzimdi josparlardyń ishinde startaptardy qoldaý qoryn qurý maqsaty bar, ol turaqty negizde «Deeptech báıge» ótkizip otyrýǵa múmkindik beredi.