8 jylǵa bas bostandyǵynan aıyrylyp, abaqtyǵa qamaldy
Sottalýshylar izdeýde júrgen jeńil kólikterdi el aýmaǵy arqyly zańsyz alyp ótýge járdemdesken ulttyq qaýipsizdik departamenti ókilderine para bermek bolǵan.
Mamlıýt aýdandyq ishki ister bólimi bastyǵynyń orynbasary Q.Bekenov Qyrǵyzstan azamatynyń ınterpol izdeý salǵan kólikterdi Bishkek qalasyna tasymaldap júrgenin sezip, alym talap etý áreketine kirisken. Aram oıyn oblystyq ishki ister departamenti basqarmasynyń jedel ýákili M.Muhamedjanovpen birge júzege asyryp, odan qomaqty para alyp otyrǵan. Ol úshin «Jańajol» kóliktik baqylaý beketinen qymbat kólikterdi esh kedergisiz ótkizip, sheteldik valıýtamen esep aıyrysqan. Ár kólik úshin 500 AQSh dollary mólsherinde alym belgilegen. Qyrǵyz Respýblıkasynyń turǵyny Ishımovtyń kontrabandalyq júk tasýmen 2013 jyldan beri aınalysqanyn esepteıtin bolsaq, qansha «paıdaǵa» kenelgenin baǵamdaı berińiz.
Ulttyq qaýipsizdik komıteti oblystyq basqarmasy sheteldik azamattyń zańsyz áreketine tosqaýyl qoıyp, «temir tulparlardy» tárkilegennen keıin ońaı oljadan aıyrylmaýdy kózdegen ol taǵy da ekeýiniń «kómegine» júgingen. Olar tárkilengen kólikterdi keri qaıtarý maqsatymen ulttyq qaýipsizdik departamentiniń qyzmetkerlerine 10 myń dollar para usynǵan.
Oblystyq sot sottalǵandardyń apellıasııalyq shaǵymdaryn qanaǵattandyrýsyz qaldyrdy.
Baqyt RAMAZAN,
jýrnalıst.
Soltústik Qazaqstan oblysy.